Barack Obama dhe gruaja e tij Michelle u rikthyen sot në Shtëpinë e Bardhë për zbulimin e portreteve të tyre zyrtare, në një ceremoni që u zhvillua më shumë se pesë vjet pasi ish-çifti presidencial amerikan dha dorëheqjen.
Barack Obama është paraqitur me një kostum gri në një sfond të bardhë, në portretin e Robert McCarty, që të kujton atë të Nelson Mandelës nga i njëjti artist.
Ish-Zonja e Parë e SHBA-së, Michelle Obama, është pikturuar me një fustan blu në dhomën e kuqe të Shtëpisë së Bardhë, portret nga Sharon Sprang.
“Kam takuar pak njerëz me më shumë integritet, mirësjellje dhe guxim si Barack Obama,” tha Presidenti Biden në eventin zyrtare të zbulimit të portretit. “Asnjë përgatitje për marrjen e presidencës së Shteteve të Bashkuara nuk do të ishte më e mirë se prania ime pranë jush për tetë vjet”, theksoi ai.
Portrete zyrtare të presidentëve amerikanë dhe zonjave të para zbukurojnë muret në korridoret dhe dhomat e Shtëpisë së Bardhë.
Është zakon që një ish-president të kthehet në Shtëpinë e Bardhë për zbulimin e portretit të tij me ftesë të pasardhësit të tij, por republikani Donald Trump nuk mbajti një ceremoni për Obamat gjatë kohës që ishte në detyrë. Përpara se të fitonte zgjedhjet në 2016 dhe të pasonte Obamën në 2017, Trump argumentoi se paraardhësi i tij nuk kishte lindur në Shtetet e Bashkuara dhe për këtë arsye nuk kishte të drejtë të ishte president i Shteteve të Bashkuara.
Kjo ishte hera e dytë që Barack Obama kalonte pragun e Shtëpisë së Bardhë pas largimit nga detyra. Ai i mëparshmi ishte prillin e kaluar, në një ngjarje të Presidentit Biden për reformën e sistemit kombëtar shëndetësor, të njohur si Obamacare./albeu.com
