Autoriteti Rrugor Shqiptar ka sqaruar përmes një reagimi në “Facebook” situatën lidhur me mungesën e një hyrje-daljeje në Papër, përgjatë autostradës së re Elbasan-Rrogozhinë.
Sipas ARRSH-së, projekti i kësaj vepre infrastrukturore përfshin ndërtimin e një nyjeje në Papër. Kjo ndërhyrje do të krijojë lidhjen e zonës së Papërit, Cërrikut dhe territoreve përreth me autostradën.
Të lidhura
None found
Autoriteti bën të ditur se nyja nuk është pjesë e kontratave që ndodhen aktualisht në zbatim. Realizimi i saj është parashikuar në një fazë të mëtejshme, në përputhje me planifikimin dhe vijimin e projektit.
ARRSH deklaron se do të vijojë të informojë në mënyrë të vazhdueshme dhe transparente publikun për ecurinë e projekteve infrastrukturore, duke theksuar rëndësinë e të dhënave të sakta dhe të verifikuara për çështjet me interes publik.
Institucioni shprehet se mbetet në dispozicion për çdo informacion shtesë mbi projektin dhe punimet, ndërsa falënderon qytetarët për mirëkuptimin.
