Nga sheshi i protestës, kreu i Lëvizjes Bashkë, Arlind Qori, komentoi përplasjen mes qeverisë dhe lëvizjes qytetare e studentore, duke kritikuar qëndrimin e kryeministrit Edi Rama.
Sipas Qorit, kreu i qeverisë ka humbur arsyen, legjitimitetin dhe aftësinë për të drejtuar vendin. Ai deklaroi se kërcënimet ndaj të rinjve dhe familjeve të tyre nuk po japin më rezultat, pasi shqiptarët dhe veçanërisht rinia nuk shohin më as të tashme, as të ardhme nën këtë sistem.
Të lidhura
None found
Ai tha se edhe thirrjet e Ramës drejtuar prindërve për t’i ndaluar fëmijët të marrin pjesë në protesta kanë dështuar. Qori theksoi se prindërit janë bashkuar me të rinjtë, pasi, sipas tij, e konsiderojnë Shqipërinë të pajetueshme nën ndikimin e korrupsionit, oligarkisë dhe krimit të organizuar.
Qori përmendi edhe deklaratën e fundit të kryeministrit lidhur me përdorimin e trenave nga protestuesit, duke e cilësuar atë si një shenjë të humbjes së arsyes nga ana e Ramës. Ai tha se në një vend ku nuk ka trena, kryeministri po përpiqet t’u ndalojë të rinjve pjesëmarrjen në protestë me kërcënime të tilla.
Kreu i Lëvizjes Bashkë deklaroi se Edi Rama i ka marrë popullit shqiptar gjithçka dhe se një rini që nuk ka më çfarë të humbasë, por vetëm të ardhmen për të fituar, është ngritur masivisht në protestë.
Qori vlerësoi se zhvillimet e fundit tregojnë dështimin e strukturave tradicionale politike dhe se vendi po përballet me pasojat e korrupsionit dhe oligarkisë. Në fund, ai u bëri thirrje të gjithë qytetarëve të Republikës së Shqipërisë t’i bashkohen protestës, duke argumentuar se sistemit të vjetër politik dhe oligarkik po i vjen fundi.
