Kthimin në Kuvend të ligjit për Dhomat e Specializuara, deputeti i Aleancës, Besnik Tahiri, e ka cilësuar si hap që ka dëmtuar kauzën e luftës për liri, raporton Ekonomia Online.
Në kritikat e tij, Tahiri është ndalur te qëndrimi i Qeverisë. Ai ka shprehur habi që ekzekutivi po reagon me pretendimin se është zbuluar një gabim, ndonëse, sipas tij, e kishte pasur ligjin për dy javë dhe nuk kishte bërë asnjë koment. Këtë reagim të Qeverisë ai e ka përshkruar si derdhje lotësh krokodili.
Të lidhura
None found
Sipas deputetit, Aleanca e vlerëson rikthimin e ligjit si një veprim skajshmërisht të dëmshëm, joserioz dhe të papranueshëm. Ai ka thënë se, në thelb, ky hap e ka cenuar kauzën dhe se partia do të ndjekë se si do të zhvillohet më tej çështja.
Tahiri ka nënvizuar se ajo që mbrohet në Hagë është e vërteta dhe rrëfimi për lirinë, jo partitë politike. Në këtë drejtim, ai ka shprehur vendosmërinë e Aleancës për të mos lejuar që të dëmtohet kauza e luftës për liri.
Sa u përket ndërhyrjeve të mundshme në ligj, deputeti ka sqaruar se Aleanca nuk ka ende dijeni se çfarë parashikohet të ndryshojë. Ai e ka lidhur këtë mungesë informacioni me faktin se ende nuk e kanë parë letrën me të cilën presidentja e ka kthyer ligjin.
