Ashpërsimi i politikës së dënimeve për korrupsionin e nivelit të lartë dhe për veprat penale kundër rendit kushtetues e sigurisë së Kosovës ishte në qendër të një takimi të zhvilluar sot ndërmjet drejtuesve të Prokurorisë së Shtetit dhe përfaqësuesve të Gjykatës Supreme të Kosovës.
Kryetari i Gjykatës Supreme, Fejzullah Rexhepi, dhe gjyqtari i kësaj gjykate, Agim Maliqi, u pritën nga Kryeprokurori i Shtetit, Zejnulla Gashi, dhe zëvendëskryeprokurori i Shtetit, Bahri Hyseni.
Të lidhura
None found
Gjatë bisedës u theksua rëndësia e trajtimit të këtyre veprave penale, krahas fuqizimit të mekanizmave institucionalë për të luftuar dukuritë që cenojnë funksionimin e shtetit dhe besimin e qytetarëve te drejtësia.
Në takim u shqyrtuan edhe mundësitë për të zhvilluar më tej bashkëpunimin mes Prokurorisë së Shtetit dhe Gjykatës Supreme. Synimi është përmirësimi i koordinimit institucional dhe përmbushja e përgjegjësive të secilit institucion, transmeton “Bota sot”.
Njoftimi bën të ditur se të dy drejtuesit shprehën angazhimin për ta zgjeruar bashkëpunimin e ndërsjellë, duke respektuar në çdo rast kompetencat dhe detyrimet që u përcakton ligji.
Përmes këtij bashkëpunimi synohet të mbështetet forcimi i sundimit të ligjit dhe të rritet efikasiteti i funksionimit të sistemit të drejtësisë në Kosovë.







