PDK-ja të hënën kërkon interpretim nga Kushtetuesja për konstituimin e Kuvendit dhe votimin e qeverisë

Partia Demokratike e Kosovës ka njoftuar se nesër, në orën 09:00, do t’i drejtohet Gjykatës Kushtetuese për interpretim lidhur me konstituimin e Kuvendit të Kosovës dhe votimin e qeverisë së re, të zhvilluar të dielën.

Njoftimi do të bëhet përmes një konference për media para Gjykatës Kushtetuese të Republikës së Kosovës. PDK-ja do të përfaqësohet nga kryetari i Grupit Parlamentar, Arian Tahiri, deputeti Përparim Gruda dhe avokati Faton Fetahu.

Gjatë ditës, kjo parti deklaroi se e vlerëson Kuvendin si të pakonstituuar dhe Qeverinë si jokushtetuese.

Ndërkohë, pas seancës së jashtëzakonshme të Kuvendit të Kosovës, ku u zgjodh qeveria e re, kryeministri i rizgjedhur Albin Kurti i kërkoi PDK-së të propozojë sa më shpejt kandidatin për nënkryetar të Kuvendit. Sipas Kurtit, ky hap do t’i mundësonte PDK-së angazhimin në punën e komisioneve parlamentare.