Ministrja e Mjedisit, Fitore Pacolli, ka rikujtuar se hapja e sezonit të gjuetisë nuk e ndryshon ndalesën ligjore për këtë veprimtari në Parqet Kombëtare “Bjeshkët e Nemuna” dhe “Sharri”.
Përmes një postimi në Facebook, ajo njoftoi se në këto dy zona të mbrojtura do të shtohet mbikëqyrja, me synim frenimin e gjuetisë së kundërligjshme dhe ruajtjen e faunës së egër.
Të lidhura
None found
Kontrollet do të kryhen nga rojet e parqeve, ndërsa monitorimi do të mbështetet edhe nga dronët, kamerat kurth dhe patrullimet në terren.
Pacolli bëri të ditur se zbatimi i këtyre masave do të realizohet në bashkëpunim me Policinë e Kosovës dhe institucionet e tjera kompetente, për të garantuar respektimin e ligjit dhe mbrojtjen e biodiversitetit në zonat e mbrojtura.
Ajo theksoi se, edhe pse sezoni i gjuetisë ka nisur, ndalesa për gjuetinë vazhdon të jetë në fuqi në territoret e Parqeve Kombëtare “Bjeshkët e Nemuna” dhe “Sharri”.
