Kurti: Bondsteel të shndërrohet në prani të përhershme ushtarake amerikane në Kosovë

Kryeministri në detyrë i Kosovës, Albin Kurti, priti në Zyrën e Kryeministrit senatorën amerikane Joni Ernst, me të cilën bisedoi për zhvillimet në vend dhe marrëdhëniet e partneritetit me Shtetet e Bashkuara të Amerikës.

Gjatë takimit, një vëmendje e veçantë iu kushtua pranisë ushtarake amerikane në Kosovë. Kurti deklaroi se Kampi Bondsteel duhet të kthehet në një bazë të përhershme të Shteteve të Bashkuara në Republikën e Kosovës.

Sipas tij, një prani e tillë do të garantonte paqen dhe sigurinë në Kosovë e në rajon, ndërsa do të përbënte edhe një pikë strategjike për operacionet e NATO-s në Evropën Juglindore.

“Kampi Bondsteel duhet të shndërrohet në prezencë të përhershme ushtarake në Republikën tonë. Një prezencë e tillë do të shërbente si garantuese për paqe dhe siguri në Kosovë dhe rajon, si dhe një bazë strategjike për operacionet e NATO-s në Evropën Juglindore”, ka deklaruar Kurti.

Kurti bëri të ditur se me senatoren Ernst diskutoi gjithashtu për ecurinë e Kosovës në fushën e rritjes ekonomike dhe përmirësimin e gjendjes së sigurisë së brendshme.

Ai e cilësoi Joni Ernstin një prej mikeve dhe mbështetëseve të rëndësishme të Republikës së Kosovës, si dhe një nga zërat më të fortë në mbështetje të vendit në Kongresin amerikan.

Takimi u zhvillua pas bisedës që Kurti dhe Ernst patën në shtator të vitit të kaluar në Washington DC.