Kolonat në kufirin kroat, Konjufca bisedon me homologun e tij për lehtësimin e pritjeve

Ministri i Punëve të Jashtme, Glauk Konjufca, njoftoi se ka zhvilluar një bisedë telefonike me ministrin kroat të Punëve të Jashtme dhe Evropiane, Gordan Grlić Radman, për shkak të pritjeve të gjata të qytetarëve të Kosovës dhe bashkatdhetarëve nga diaspora në pikat kufitare të Kroacisë.

Në një postim në Facebook, Konjufca bëri të ditur se homologut kroat i ka përcjellë shqetësimin për vështirësitë që po u krijohen udhëtarëve nga këto vonesa, sidomos në kulmin e sezonit veror.

Ai tha se Grlić Radman e ka informuar se çështja do të diskutohet me autoritetet përgjegjëse kroate, për të vlerësuar mundësitë e lehtësimit të qarkullimit dhe shkurtimit të kohës së pritjes.

“Sot zhvillova një bisedë telefonike me ministrin e Punëve të Jashtme dhe Evropiane të Republikës së Kroacisë, z. Gordan Grlić Radman, lidhur me pritjet e gjata që po përjetojnë qytetarët tanë dhe bashkatdhetarët nga diaspora në pikat kufitare kroate.

Gjatë bisedës shpreha shqetësimin për vështirësitë që këto pritje po u shkaktojnë qytetarëve tanë në kulmin e sezonit veror. Ministri Grlić Radman më bëri të ditur se këtë problem do ta adresojë me autoritetet kompetente të Kroacisë, në mënyrë që të shqyrtohen mundësitë për qarkullim më të lehtë dhe reduktim të kohës së pritjes”, ka shkruar Konjufca.