Autoritetet irlandeze po vlerësojnë mundësinë e rritjes së numrit të ushtarëve të vendit në misionin e NATO-s në Kosovë, KFOR, pas përfundimit të angazhimit paqeruajtës të Kombeve të Bashkuara në Liban.
Aktualisht, në KFOR shërbejnë rreth 13 ushtarë irlandezë, ndërsa planifikuesit ushtarakë po analizojnë mundësinë e forcimit të pranisë së tyre edhe në këtë mision, edhe në operacionin e Bashkimit Evropian në Bosnjë-Hercegovinë, Althea, raportoi “Irish Times”.
Të lidhura
None found
Megjithatë, procesi ndodhet ende në një fazë të hershme dhe deri tani nuk është vendosur se sa trupa mund të dërgohen në këto dy misione.
Rishikimi i angazhimeve të mundshme ndërkombëtare lidhet me vendimin për të mbyllur gradualisht misionin UNIFIL në jug të Libanit, ku ndodhen më shumë se 300 ushtarë irlandezë. Tërheqja e trupave pritet të nisë në fillim të vitit të ardhshëm, duke përmbyllur praninë gati pesëdekadëshe të Irlandës në atë rajon.
Strukturat ushtarake irlandeze i kanë kërkuar qeverisë të përcaktojë misione të tjera ndërkombëtare ku Forcat e Mbrojtjes mund të marrin pjesë. Kjo do të krijonte hapësira të reja angazhimi për personelin dhe do të ndihmonte në mbajtjen e ushtarëve në shërbim.
Gjenerallejtënant Rossa Mulcahy, shefi i Shtabit të Forcave të Mbrojtjes së Irlandës, ka paralajmëruar se mbyllja e misionit në Liban do të jetë një sfidë për ushtrinë e vendit. Sipas tij, kjo nuk nënkupton përfundimin e pjesëmarrjes irlandeze në misionet jashtë vendit.
Një zgjerim i mundshëm i kontributit në KFOR dhe në Althea mund të bëhet edhe nëse vazhdon të zbatohet mekanizmi i trefishtë i miratimit, i njohur si “Triple Lock”, pasi të dyja operacionet mbështeten në mandate të Kombeve të Bashkuara.
Sipas këtij mekanizmi, për angazhimin e më shumë se 12 ushtarëve irlandezë në misione paqeruajtëse jashtë vendit nevojitet një mandat i OKB-së. Qeveria e Irlandës synon ta heqë këtë kërkesë, duke argumentuar se ajo u lejon Rusisë dhe Kinës, si anëtare të përhershme të Këshillit të Sigurimit të OKB-së, të pengojnë dërgimin e trupave irlandezë.
Partitë opozitare, nga ana tjetër, e mbrojnë “Triple Lock” dhe e shohin atë si një garanci të rëndësishme për ruajtjen e neutralitetit të Irlandës.
