Categories: kosovë

Familja e Haki Imerit pas vendimit në Hagë: Mos e dëgjoni Richard Grenellin

Pas vendimit të Gjykatës Speciale në Hagë për ish-drejtuesit e Ushtrisë Çlirimtare të Kosovës, familja e veprimtarit të vrarë Haki Imeri ka dalë me një reagim publik.

Të lidhura

None found

Familja ka kujtuar se kjo gjykatë u krijua nga Parlamenti i Kosovës, ndaj përballja me vendimet e saj ishte diçka që duhej pritur që në momentin e themelimit. Në reagim thuhet: “Parlamenti i Kosovës e ka themeluar, dhe kur e keni themeluar është dasht ta kuptoni se kjo ditë një ditë do të vijë”.

Duke iu referuar përfundimit të shpallur në Hagë, familja e Imerit shkruan: “Gjykata Speciale foli. Gjykata Speciale e dha verdiktin”. Ajo ka bërë thirrje për qetësi dhe për pritjen e fazave të tjera të procesit gjyqësor.

Në reagim janë kundërshtuar gjithashtu deklaratat e ish-emisarit amerikan për dialogun Kosovë-Serbi, Richard Grenell, të bëra pas vendimit. Qytetarëve u është kërkuar të mos krijojnë besim te pretendimet për ndërhyrje politike në këtë proces.

“Mos u besoni ‘miqve’ të Grenellit se ata nuk mund t’i ndihmojnë askujt në këtë proces”, thuhet në qëndrimin e familjes së Imerit.

Kritikat ndaj Grenellit janë shprehur edhe më drejtpërdrejt në një pjesë tjetër të reagimit: “Mos e dëgjoni Richard Grenellin se ai nuk u kryen punë shqiptarëve, ai i kryen punë veç Vuçiqit”.

Familja pretendon se qëndrimet e Grenellit dhe të mbështetësve të tij kishin ushqyer pritshmëri se ish-presidenti Hashim Thaçi nuk do të dënohej, pasi do të shpëtohej nëpërmjet ndërhyrjes së presidentit amerikan Donald Trump dhe Grenellit.

Në vijim të kritikave ndaj pozicioneve të tij, në reagim kërkohet që Grenelli të shpallet person i padëshiruar në Kosovë. “Grenelli duhet të shpallet ‘non grata’ në Kosovë”, thuhet aty.

Në përmbyllje, familja e Haki Imerit ka kërkuar që vendimi i Gjykatës së Apelit të pritet me durim dhe pa paragjykime. “Prisni Apelin me durim dhe mos paragjykoni”, theksohet në reagim, ku nënvizohet se dënimi mund të ndryshojë gjatë procedurës së apelit, në varësi të vendimit që do të marrë gjykata.