Ushtruesja e detyrës së presidentes, Albulena Haxhiu, ka reaguar pas vendimit të PDK-së dhe AAK-së për të mos pranuar ftesën për takim, të cilin ajo e kishte thirrur me synimin për të arritur një konsensus politik dhe për të zhbllokuar situatën në vend.
Haxhiu ka shprehur keqardhje për këtë qëndrim, duke e cilësuar refuzimin si të gabuar dhe si shenjë të mungesës së vullnetit për të kapërcyer, sipas saj, “pozicionimet barrikaduese”.
Të lidhura
None found
Ajo ka vlerësuar se tri palë zgjedhje të zhvilluara njëra pas tjetrës, me rezultate të përafërta, dëshmojnë nevojën për dialog politik. Sipas saj, kjo nevojë është veçanërisht e theksuar kur bëhet fjalë për çështjen e Presidentit.
Haxhiu ka paralajmëruar se, nëse nuk arrihet marrëveshje për Presidentin, Kosova mund të përballet përsëri me zgjedhje, të cilat, në vlerësimin e saj, nuk do të prodhonin një zgjidhje të re.
Haxhiu ka publikuar edhe reagimin e plotë:
Zgjedhjet e shkurtit 2025 përbënin zgjedhjet e fundit të rregullta, pas përfundimit të një mandati të plotë qeverisës. Pas tyre u mbajtën zgjedhjet e 28 dhjetorit të po atij viti dhe më pas ato të 7 qershorit të këtij viti. Të dyja këto procese zgjedhore ishin të panevojshme dhe të dëmshme për qytetarët dhe buxhetin e Republikës. Për më tepër, të gjitha këto zgjedhje rezultuan me rezultate të ngjashme.
Tri procese zgjedhore të njëpasnjëshme, me rezultate të përafërta, janë dëshmi e mjaftueshme se pa dialog politik, sidomos për çështjen e Presidentit, nuk mund të ketë përparim. Nëse gjatë dimrit dhe pranverës së këtij viti kërkesa dhe ankesa kryesore ishte që të zhvillohej dialog paraprak përpara çdo konstituimi të institucioneve, pavarësisht rezultatit, tani është koha, mundësia dhe domosdoshmëria që kjo të vihet në zbatim. Duhet të nisim nga çështja që realisht po na rikthen vazhdimisht te zgjedhjet, e jo nga ajo që mund të realizohet më lehtë: nyja kryesore është çështja e Presidentit.
Edhe pse në aspektin formal kjo përbën hapin e tretë, në rrethanat aktuale çështja e Presidentit duhet të jetë pikënisja jonë. Është e qartë se pa një marrëveshje për këtë çështje hapet rruga drejt një procesi të ri zgjedhor, i cili praktikisht nuk do të sillte asgjë të re dhe aq më pak një zgjidhje.
Duke u mbështetur në këto fakte dhe në përvojën e dy viteve të fundit, si dhe me vullnetin për të ndërtuar një konsensus politik, kam ftuar në takim drejtuesit e të gjitha subjekteve politike parlamentare. Shpreh keqardhjen time të plotë që, pavarësisht ftesës sime të sinqertë, subjektet politike PDK dhe AAK e refuzuan atë. Ky qëndrim, sipas meje, është i gabuar, i pamatur dhe mbi të gjitha tregon mungesë vullneti për të kapërcyer pozicionimet barrikaduese. Qëndrime të tilla nuk i shërbejnë askujt, e veçanërisht jo Republikës sonë.
Qyetarët e vendit po shprehen qartë dhe vazhdimisht përmes zgjedhjeve. Detyra jonë, si përfaqësues të tyre dhe si drejtues të partive e institucioneve politike, është që këtë mesazh ta zbatojmë në praktikë. Kosova ka nevojë për shumë punë, ndërsa zgjedhjet duhet të mbeten opsioni i fundit, nëse jo të mos jenë fare një alternativë.
Shpresoj që deri të martën të ketë reflektim dhe që takimi të jetë sa më i dobishëm në drejtim të gjetjes së një zgjidhjeje.
