Afrohet 27 nëntori, data që Trupi Gjykues i Apelit ka caktuar për dorëzimin e njoftimeve të apelit ndaj aktgjykimit për ish-krerët e UÇK-së. Partia Demokratike e Kosovës thotë se po ndërmerr çdo hap të mundshëm në mbështetje të tyre.
Të lidhura
None found
Ky afat u shty me kërkesë të mbrojtjes së Hashim Thaçit, Kadri Veselit, Jakup Krasniqit dhe Rexhep Selimit. Mbrojtja përmendi si arsye ndërlikueshmërinë e çështjes dhe kohën që nevojitet për përkthimin e aktgjykimit në shqip.
Mes hapave të PDK-së është nisma për plotësim-ndryshimin e Ligjit për Dhomat e Specializuara. Përpara se të procedohet më tej në Kuvend, ajo po pret mendimin e Ministrisë së Drejtësisë. Sipas juristëve, ligji mund të ndryshohet nga pikëpamja juridike, por mbetet e dyshimtë nëse ndryshimet do të jepnin rezultat brenda kohës së mbetur.
Avokatja Fehmije Gashi Bytyqi shprehet skeptike se nisma mund të realizohet në kohë, duke theksuar se duhet marrë parasysh mënyra si funksionon procesi ligjvënës. Ajo thotë se Gjykata e Apelit mund ta bëjë aktgjykimin të formës së prerë ose ta kthejë çështjen në rigjykim; në rastin e dytë, mbrojtja do të fitonte kohë. Sipas saj, afati i shkurtër përbën rrezik pavarësisht vendimit, ndaj strategjia e mbrojtjes duhet përforcuar.
Politologu Mazllum Baraliu kërkon që institucionet e Kosovës ta monitorojnë në mënyrë aktive dhe të vazhdueshme procesin në Dhomat e Specializuara, krahas angazhimit diplomatik. Ai e cilëson Gjykatën Speciale formalisht gjykatë të Kosovës, por në praktikë një strukturë zëvendësuese të pashembullt në botë, dhe thotë se askush nuk mund ta ndalë këtë proces. Baraliu propozon një trup të veçantë, të përbërë nga Qeveria, Parlamenti dhe MPJ-ja, që të lobojë deri te vendimi i shkallës së dytë dhe t’i shpjegojë botës se ai vendim nuk mund dhe nuk do të cenojë themelet e shtetit të Kosovës.
RTK i ka kërkuar Speciales një qëndrim për nismën e PDK-së për plotësim-ndryshimin e ligjit, por nuk ka marrë përgjigje. Ndërkohë, deputetët e PDK-së kanë paralajmëruar se do t’i bojkotojnë të gjitha komisionet parlamentare derisa nisma të procedohet në Kuvend.
