Pas arrestimit të Fatmir Shehollit, Adriatik Dosti ka reaguar me akuza të forta ndaj shërbimit sekret serb BIA, duke pretenduar se prej tij kanë rrjedhur informacione dhe se në Kosovë veprojnë persona të lidhur me këtë agjenci.
Të lidhura
None found
Sipas Dostit, në listat e dyshuara përfshihen media, gazetarë, politikanë, biznesmenë dhe zyrtarë kosovarë, të cilët dyshohet se janë rekrutuar ose financuar nga Serbia. Ai u kërkon institucioneve të Kosovës që ta shfrytëzojnë këtë situatë për të hetuar pretendimet dhe për të zbuluar rrjetet e dyshuara të spiunazhit.
Megjithatë, këto akuza nuk janë konfirmuar zyrtarisht.
Dosti shkruan se në Beograd prej disa ditësh mbizotëron shqetësimi në zyrat e BIA-s, shërbimit kombëtar serb të inteligjencës.
Sipas tij, rreth një javë para arrestimit në Kosovë të Fatmir Shehollit, i cilësuar si spiun dhe bashkëpunëtor i Serbisë, në strukturat sekrete serbe nisën përplasjet dhe akuzat për nxjerrjen e informacioneve Top Secret. Këto të dhëna dyshohet se lidhen me BIA-n dhe bashkëpunëtorët e saj shqiptarë në Kosovë.
Dosti pretendon se tashmë janë tre zyrtarë të lartë të BIA-s serbe që akuzohen për nxjerrjen e informacioneve Top Secret nga zyrat e agjencisë dhe dërgimin e tyre në një drejtim të panjohur.
Ai thekson se informacionet, për shkak të përplasjeve politike dhe pakënaqësive ndaj Aleksandar Vuçiçit, dyshohet se u janë dorëzuar si mjete politike kundërshtarëve të presidentit serb. Këta të fundit, prej kohësh, e akuzojnë publikisht Vuçiçin për financime dhe veprimtari të fshehta në Kosovë.
Sipas pretendimeve, bëhet fjalë për financime, pagesa dhe sponsorizime të subjekteve e personave konkretë, përfshirë politikanë, deputetë dhe gazetarë shqipfolës. Këta persona dyshohet se janë rekrutuar nga shërbimi sekret serb dhe se veprojnë në interes të tij, në dëm të Kosovës dhe qytetarëve të saj.
Dosti i referohet një burimi anonim, identiteti i të cilit nuk bëhet i ditur për arsye të kuptueshme, ndërsa nënvizon se të dhënat ende nuk janë konfirmuar zyrtarisht dhe mbeten në pritje të publikimit.
Burimi pretendon se në Kosovë janë të paktën 3 televizione që veprojnë në interes të Serbisë, si edhe 3-4 radio, 6 portale dhe 4 gazeta.
Në të njëjtën listë, sipas këtij burimi, përfshihen edhe së paku 8-10 gazetarë, analistë dhe opinionistë të mediave shqipfolëse, të cilët dyshohet se janë paguar dhe rekrutuar nga Serbia për t’i shërbyer BIA-s.
Akuzat më të rënda, vijon pretendimi, lidhen me politikanë, deputetë, biznesmenë dhe zyrtarë të lartë të policisë, qeverisë dhe shtetit të Kosovës gjatë 10-15 viteve të fundit. Ata dyshohet se janë vënë në shërbim të Serbisë kundrejt pagesave dhe për interesa të ndryshme politike apo biznesi të paligjshëm.
Në reagimin e tij, Dosti i bën thirrje Kosovës që ta hetojë sa më shpejt dhe në mënyrë të thelluar këtë çështje. Ai sugjeron që Fatmir Sheholli të merret në pyetje për të zbuluar, siç shprehet, rrjetin e personave të dyshuar që veprojnë brenda vendit.
Ai shton se shqiptarët kanë vuajtur edhe më parë nga raste të tilla dhe i kërkon Kosovës, si edhe Albin Kurtit, të tregojnë kurajë për t’u përballur me këto akuza dhe për t’i dhënë fund veprimtarisë së dyshuar të agjentëve, spiunëve dhe tradhtarëve.
