Lumir Abdixhiku, kryetar i Lidhjes Demokratike të Kosovës, zhvilloi një takim me Ministrin e Deleguar për Evropën të Francës, Benjamin Haddad.
Të lidhura
None found
Sipas njoftimit të LDK-së, bashkëbiseduesit trajtuan situatën politike në Kosovë, rrugën drejt integrimit evropian dhe marrëdhëniet dypalëshe Kosovë-Francë. Në takim u nënvizua gjithashtu rëndësia e fuqizimit të partneritetit mes dy shteteve.
Abdixhiku vuri në pah domosdoshmërinë që institucionet e Republikës së Kosovës të bëhen funksionale sa më parë. Ai vlerësoi se qëndrueshmëria institucionale është vendimtare për çuarjen përpara të reformave, rritjen ekonomike dhe avancimin e agjendës euroatlantike të vendit.
Kreu i LDK-së falënderoi Francën për përkrahjen e pandërprerë ndaj Kosovës, duke çmuar kontributin e saj në mbështetjen e proceseve demokratike, perspektivës evropiane dhe zgjerimit të bashkëpunimit në sektorë me interes të përbashkët, thuhet në përfundim të njoftimit.
