Arsenali e ka çelur sezonin e ri të Premier Ligës me dy fitore dhe, me mbylljen e merkatos verore, “Topçinjtë” shfaqen sërish si skuadra që duhet mposhtur në luftën për titull.
Të lidhura
None found
Formacioni i Mikel Artetës e mbylli ditën e fundit të afatit kalimtar pa bujë, pasi pjesën më të madhe të punës e kishte kryer më herët.
Ndërkohë, rivalët kryesorë kanë qenë tejet aktivë në treg dhe kanë investuar shifra të larta për të riformuar ekipet e tyre, duke synuar t’i japin një goditje të ndjeshme garës për titull.
Por sa i fortë është Arsenali pas merkatos? Dhe a kanë bërë rivalët mjaftueshëm për ta ndalur kampionin në fuqi?
Arsenali u përpoq të sillte sulmuesin argjentinas të Atletico Madridit, Julian Alvarez, por lëvizja nuk pati sukses.
Pavarësisht interesimit të londinezëve, Atletico Madridi nuk dha dritë jeshile për largimin e tij, ndërsa vetë Alvarez kishte shprehur preferencë për një transferim te Barcelona.
Në fund, operacioni nuk u finalizua dhe kjo mund të jetë një nga pikat e pakta ku Arsenali mund të ketë ende boshllëk – mungesa e një sulmuesi që të sigurojë gola në vazhdimësi.
Sidoqoftë, në repartet e tjera të fushës, skuadra e Artetës duket tejet e plotësuar.
Arsenali i ka fituar dy ndeshjet e para të kampionatit, kundër Coventry Cityt dhe Aston Villës, ndërsa më parë kishte mposhtur bindshëm Manchester Cityn në Community Shield.
Edhe merkatoja verore ka qenë shumë pozitive. Bruno Guimaraes, i ardhur nga Newcastle United për 75 milionë paund, tregoi menjëherë cilësitë e tij në fitoren minimale ndaj Aston Villës, duke sjellë kreativitet, pasime depërtuese dhe agresivitet të madh në mesfushë.
Në mbrojtje, mbërritja e Ezri Konsës nga Aston Villa i jep ekipit cilësi dhe qëndrueshmëri, ndërsa Christos Tzolis, edhe pse pati një paraqitje të vështirë kundër Villës dhe u zëvendësua në pjesën e parë, ka shfaqur potencial për të qenë armë e rëndësishme në krahun e majtë.
Arsenali mund të mos e ketë arritur transferimin e Alvarezit, por kjo nuk duket të jetë goditje vendimtare.
Në fund të merkatos, “Topçinjtë” mbeten ekipi më i kompletuar dhe favoritët kryesorë për ta mbrojtur titullin.
Manchester City ka përjetuar një ndryshim të madh këtë verë.
Pep Guardiola u largua pas një dekade në krye të klubit dhe u zëvendësua nga Enzo Maresca, ndërsa u larguan edhe disa prej emrave më të njohur të viteve të suksesshme, përfshirë Rodrin, Bernardo Silvën, John Stones dhe Jack Grealish. Megjithatë, ambicia e Cityt mbetet e pandryshuar.
Klubi ka qenë jashtëzakonisht agresiv në afatin kalimtar dhe ka investuar shuma të mëdha për ta rindërtuar ekipin që të mbetet në garë për titull.
City shpenzoi 125 milionë paund për Enzo Fernandezin, duke barazuar rekordin britanik të transferimeve, ndërsa më herët kishte paguar 116 milionë paund për mesfushorin anglez Elliot Anderson nga Nottingham Forest.
Në ekip u bashkuan edhe Iliman Ndiaye nga Evertoni për 65 milionë paund, talenti 18-vjeçar maroken Ayyoub Bouaddi nga Lille për 85.6 milionë paund dhe Allan Elias nga Palmeiras.
Marrëveshja për Fernandezin e çoi shpenzimin total të Manchester Cityt në rekordin prej 458 milionë paundësh vetëm në këtë afat kalimtar, duke kaluar rekordin e mëparshëm të Liverpoolit prej 415 milionë paundësh nga vera e shkuar.
Megjithatë, City ka arkëtuar rreth 300 milionë paund nga shitjet, çka tregon përmasat e ndryshimit në ekip.
Pavarësisht largimeve të shumta, Manchester City ende posedon shumë cilësi dhe duket i aftë për një luftë serioze për titull.
Chelsea humbi Enzo Fernandezin që kaloi te Manchester City për 125 milionë paund, por kjo nuk e zbeh një afat kalimtar tejet aktiv.
Trajneri i ri Xabi Alonso ka marrë mbështetje të madhe nga drejtuesit e klubit dhe e ka nisur sezonin me dy fitore.
Një nga problemet e hershme ishte porta. Paraqitja e Robert Sanchez në fitoren kundër Fulhamit e bindi Alonson se duhej ndërhyrë, ndaj Chelsea transferoi Emiliano Martinezin nga Aston Villa.
Në sulm, Morgan Rogers, i blerë nga Aston Villa për 117 milionë paund, ka formuar një treshe shumë të rrezikshme me Cole Palmer dhe Joao Pedron.
Në mbrojtje, Maxence Lacroix është një tjetër përforcim cilësor, ndërsa Chelsea ka ndryshuar strategji duke sjellë edhe lojtarë me përvojë si Jordan Henderson dhe Danny Welbeck.
“Blutë” tentuan një lëvizje tjetër në ditët e fundit të merkatos, por Monaco e ndërpreu marrëveshjen për mesfushorin Lamine Camara.
Chelsea ka një ekip shumë të gjerë dhe, pa angazhime në Evropë, mund të ketë më shumë energji për kampionatin. Gjithsesi, për momentin, ata mbeten kandidatë të jashtëm për titull.
Detyra kryesore e Liverpoolit këtë verë ishte gjetja e një mënyre për të kompensuar largimin e Mohamed Salahut.
Bradley Barcola ishte objektivi kryesor dhe në fund u transferua nga Paris Saint-Germain për 123 milionë paund.
Francezi sjell shpejtësi, kreativitet dhe gola, por nuk është zëvendësues i drejtpërdrejtë i Salahut, pasi preferon të luajë në krahun e majtë.
Victor Munoz, pjesë e kombëtares së Spanjës, është një tjetër alternativë në krah dhe tashmë ka treguar potencialin e tij, duke shënuar një gol spektakolar në barazimin 2-2 kundër Nottingham Forest.
Liverpooli nuk është përpjekur thjesht të gjejë një “Salah të ri”, por ka zgjedhur ta shpërndajë përgjegjësinë e golave në disa pozicione.
Megjithatë, mbetet një problem i madh nga sezoni i kaluar: mungesa e një mesfushori tipik “numër 6”.
Kjo ka krijuar çekuilibër në mesfushë dhe Liverpooli vazhdon të jetë shumë i ekspozuar ndaj kundërsulmeve.
Barazimet kundër Newcastle United dhe Nottingham Forest kanë treguar se kjo dobësi ende nuk është eleminuar.
Nëse Liverpooli nuk arrin ta korrigjojë këtë problem gjatë sezonit, pikërisht kjo mund t’i kushtojë një tjetër mundësi për të luftuar për titull.
Manchester United e kishte forcuar ndjeshëm sulmin verën e kaluar me Benjamin Seskon, Bryan Mbeumon dhe Matheus Cunhan.
Këtë herë fokusi ishte kryesisht te mesfusha, ku klubi afroi Youri Tielemans, Andrey Santos dhe Carlos Baleba.
Por a mjafton kjo për ta kthyer Unitedin në pretendent serioz për titull? Me shumë gjasa, jo.
Michael Carrick, i cili sezonin e kaluar e dërgoi ekipin në vendin e tretë dhe siguroi rikthimin në Ligën e Kampionëve, tashmë është konfirmuar si trajner i përhershëm.
Megjithatë, starti i sezonit ka qenë i luhatshëm, me humbje ndaj Hull Cityt dhe fitore 5-2 ndaj Ipswich Town.
United nuk bëri lëvizje të tjera në orët e fundit të merkatos dhe skuadra duket më shumë e ndërtuar për një tjetër garë për katërshen e parë sesa për titullin e Premier Ligës.
Tottenham Hotspur ka qenë ndër klubet më aktive në afatin kalimtar, duke shpenzuar mbi 300 milionë paund.
Sidoqoftë, rezultatet e para nuk kanë qenë në nivelin e investimeve.
Spurs kanë pësuar dy humbje në kampionat, ndaj Brentfordit dhe Newcastle United.
Trajneri Roberto De Zerbi ka marrë mbështetje të madhe nga klubi dhe në ditët e fundit të merkatos arriti të sigurojë një nga dëshirat e tij, Mykhailo Mudryk, me të cilin kishte punuar te Shakhtar Donetsk.
Mudryk nuk ka luajtur asnjë ndeshje zyrtare që nga nëntori i vitit 2024, ndaj rikthimi i tij në nivelin më të lartë do të kërkojë kohë.
De Zerbi duhet t’i bashkojë në një ekip funksional plot 10 afrime të reja, përfshirë Tosin Adarabioyon nga Chelsea.
Materiali duket premtues, por sfida më e madhe do të jetë ndryshimi i mentalitetit të Tottenhamit, që ka përfunduar në vendin e 17-të në dy sezonet e fundit.
Aston Villa e mbylli sezonin e kaluar në vendin e katërt dhe fitoi Ligën e Evropës, duke zhvilluar një sezon të jashtëzakonshëm nën drejtimin e Unai Emeryt. Por vera ka sjellë ndryshime të mëdha.
Portieri Emiliano Martinez, mbrojtësit Lucas Digne dhe Ezri Konsa, mesfushorët Morgan Rogers dhe Youri Tielemans, si dhe sulmuesi Ollie Watkins u larguan nga klubi.
Në vend të tyre erdhën portieri japonez Zion Suzuki nga Parma, Taylor Harwood-Bellis nga Southampton, Aaron Wan-Bissaka në huazim nga West Ham United dhe Matteo Ruggeri nga Atletico Madrid.
Aston Villa transferoi gjithashtu Johan Manzambin nga Freiburg, Ibrahim Mbaye nga Paris Saint-Germain, Nicolas Jackson nga Chelsea dhe veteranin gjerman Leon Goretzkën.
Rindërtimi u plotësua me Joao Gomes nga Wolverhampton Wanderers dhe Alejandro Garnacho, i huazuar nga Chelsea.
Edhe për një trajner si Emery do të duhet kohë për t’i dhënë formë një skuadre kaq të ndryshuar, por spanjolli ka marrë mjetet e nevojshme për ta synuar sërish një vend në katërshen e parë.
Arsenali e mbyll afatin kalimtar veror në pozitë të favorshme. Skuadra e Artetës duket më e plotësuar se shumica e rivalëve dhe, pavarësisht dështimit për të transferuar një sulmues të nivelit të Julian Alvarezit, “Topçinjtë” mbeten favoritët kryesorë për titull.
Manchester City ka kryer një rindërtim të madh, Chelsea ka investuar fuqishëm, ndërsa Liverpooli ka përforcuar repartin ofensiv.
Manchester United duket më shumë kandidat për Ligën e Kampionëve, ndërsa Tottenham dhe Aston Villa mbeten skuadra me potencial, por me shumë pikëpyetje.
