Deputeti i Lidhjes Demokratike të Kosovës, Anton Quni, shprehu mbështetjen e tij për kandidaturën e Bekim Sejdiut për president të Kosovës, pak para nisjes së mbledhjes së Grupit Parlamentar të LDK-së.
Të lidhura
None found
Quni tha se e njeh nga afër familjen Sejdiu dhe vlerësoi trashëgiminë e saj, duke e cilësuar si një familje me peshë të madhe familjare dhe individuale.
Ai u shpreh i bindur se kandidatura e Sejdiut do ta bëjë krenar tërë kombin e Kosovës.
“Kam mbështetur kandidaturën e Bekim Sejdiut për president të ardhshëm. Unë e njoh për së afërmi. Disa burra nga kjo familje kanë marrë pjesë në beteja të ndryshme për çlirimin e Kosovës. Përmes tij kam krijuar edhe përshtypjen time për familjen Sejdiu. Në këtë rast nuk kam pasur asnjë hamendje, pasi kjo familje bart një bagazh të fuqishëm familjar e individual. Jam mëse i bindur se do ta bëjë krenar tërë kombin e Kosovës”, deklaroi Quni.
Ndërkohë, pas një sërë takimesh, kreu i LDK-së, Lumir Abdixhiku, dhe kryetari i LVV-së, Albin Kurti, arritën dje një marrëveshje për kandidatin konsensual për president.
