Gjatë natës, forcat ukrainase kanë sulmuar një bazë ajrore ushtarake dhe një prej rafinerive më të mëdha të naftës në Rusi, bëjnë të ditur kanalet që monitorojnë zhvillimet.
Të lidhura
None found
Një sulm i dyshuar me dronë shkaktoi zjarr në rafinerinë e Kirishit, e cila ndodhet në rajonin e Leningradit. Objekti, i njohur gjithashtu me emrin Kinef, renditet ndër qendrat kryesore ruse për përpunimin e naftës dhe është përfshirë në sanksionet e Shteteve të Bashkuara dhe aleatëve të Ukrainës.
Aleksandr Drozdenko, guvernatori i Leningradit, deklaroi se një dron ra pranë rafinerisë, ku më pas shpërtheu një zjarr. Ai tha se sistemet ruse të mbrojtjes ajrore rrëzuan 62 dronë mbi rajon. Deri tani nuk janë publikuar të dhëna mbi shkallën e dëmeve ose për viktima të mundshme. Ndërkohë, shpërthime të forta u raportuan edhe në bazën ajrore të Jejskut, në rajonin e Krasnodarit.
Prani dronësh ukrainas u evidentua gjithashtu në rajonet e Smolenskut dhe Brianskut, megjithëse nuk dihet nëse atje janë goditur objektiva të tjera. Operacioni nuk është konfirmuar ende zyrtarisht nga autoritetet ukrainase, ndërsa informacionet e ardhura nga terreni nuk kanë qenë të mundura të verifikohen në mënyrë të pavarur.
Këto sulme ndodhën një ditë pasi forcat ukrainase goditën objektiva në Rostov, si edhe disa instalime ushtarake ruse në territoret e pushtuara. Mes tyre ishin qendra për ruajtjen dhe lëshimin e dronëve në Donetsk dhe në Krimenë e aneksuar.
Sipas qëndrimit të Kievit, sulmet në brendësi të territorit rus synojnë të reduktojnë kapacitetin e Moskës për të vijuar luftën.
