Një gjykatë në Ekuador e ka gjetur fajtor ish-presidentin Lenín Moreno për marrje ryshfeti nga një grup kinez ndërtimi, në këmbim të sigurimit të kontratës publike për hidrocentralin Coca Codo Sinclair.
Të lidhura
None found
Në kuadër të kësaj dosjeje korrupsioni, sipas njoftimit të Prokurorisë, fajtorë janë shpallur katër persona. Masa përfundimtare e dënimit ndaj Morenos nuk është caktuar ende nga gjykata, ndërsa organi i akuzës ka kërkuar 6 vite e 6 muaj burg për ish-kreun e shtetit.
Prokuroria pretendon se Moreno bënte pjesë në një skemë korruptive që funksionoi gjatë viteve 2009–2018. Hetimet lidhen me kontratën për ndërtimin e hidrocentralit të madh Coca Codo Sinclair, i realizuar nga kompania kineze Sinohydro.
Në këtë rast, Sinohydro akuzohet se ka paguar rreth 76 milionë dollarë në formë ryshfeti.
Moreno është 73 vjeç dhe përdor karrige me rrota. Ai i ka kundërshtuar në mënyrë të vazhdueshme akuzat dhe, pas shpalljes së vendimit, tha se nuk kishte përfituar “asnjë qindarkë nga Sinohydro”. Ish-presidenti e cilësoi procesin ndaj tij si pjesë të një përndjekjeje politike të organizuar nga Rafael Correa.
Rreth dy duzina persona të tjerë janë hetuar për të njëjtën çështje, përfshirë bashkëshorten dhe vajzën e Morenos, drejtues të kompanive dhe një ish-ambasador kinez në Quito.
Përpara se të merrte drejtimin e Ekuadorit, Lenín Moreno shërbeu si nënkryetar i Rafael Correas. Ai e pasoi më pas në postin e presidentit, duke qeverisur vendin nga viti 2017 deri në vitin 2021.
Edhe pse në fillim shihej si trashëgimtari politik i Correas, Moreno u shkëput më vonë nga ish-mentori i tij dhe e afroi orientimin politik të Ekuadorit me Shtetet e Bashkuara.
Rafael Correa, i cili ishte në krye të Ekuadorit gjatë periudhës 2007–2017, aktualisht banon në Belgjikë. Në vitin 2020, ai u dënua në mungesë me 8 vite burg për korrupsion, ndërsa autoritetet belge i kanë njohur azilin politik.
