Interesi i të rinjve për informatikën po shtohet, ndërsa tregu i punës kërkon gjithnjë e më shumë specialistë të teknologjisë. Mes tyre është edhe Daniel Isufaj nga Pogradeci, i cili ka përfunduar studimet në këtë fushë.
Përzgjedhja në rritje e degëve të informatikës lidhet si me nevojën për profesionistë, ashtu edhe me shtrirjen e përdorimit të teknologjisë në një numër të madh shërbimesh publike dhe private.
Të lidhura
None found
Njohuritë e marra gjatë studimeve, Danieli ka nisur t’i zbatojë përmes projekteve konkrete. Duke përdorur buxhetin e tij, ai ka realizuar prototipin e parë të një roboti inteligjent, të aftë të kryejë disa detyra në të njëjtën kohë.
Pajisja mat temperaturën, lagështirën dhe intensitetin e dritës, ndërsa mund të sinjalizojë edhe rastet e zjarrit. Përmes kamerës, roboti transmeton gjithashtu pamje reale të elementeve që monitoron.
Danieli ka treguar se aktualisht po përqendrohet te zhvillimi i projekteve të internetit dhe robotikës. Për ndërtimin e robotit ka përdorur mikrokontrollues, të njohur gjerësisht në këtë fushë, si dhe sensorë të ndryshëm, të cilët i ka ndërthurur për të krijuar një pajisje që lëviz, vëzhgon kushtet atmosferike dhe paraqet të gjitha matjet e kryera.
Pas realizimit të disa përmirësimeve të tjera, objektivi i tij është që roboti të shfrytëzohet në të ardhmen edhe për eksplorimin e Liqenit të Ohrit.
Megjithëse teknologjia krijon mundësi të shumta punësimi, eksperienca mbetet ndër kriteret që kërkohet më shpesh nga punëdhënësit. Kjo e vështirëson përfshirjen e të rinjve në tregun e punës dhe, sipas Danielit, është një prej arsyeve që i nxit shumë prej tyre të shqyrtojnë mundësitë jashtë vendit.
