Mëngjesin e sotëm 23 gusht 2023, një burrë dhe një grua me origjinë shqiptare, janë gjetur të pajetë në hyrje të një pallati në Nea Smyrni të Athinës, me plagë të shkaktuara nga armë zjarri.
Autoritetet greke dyshojnë se bëhet fjalë për një rast vrasje të ndjekur nga vetëvrasja, raporton Protothema.
Të lidhura
None found
Sipas të dhënave paraprake të hetimit, burri dyshohet se i kishte zënë pritë 45-vjeçares në rrugën “Grigoriou Kydonion 3”.
Ai dyshohet se e ka qëlluar për vdekje dhe më pas ka vrarë veten.
Në pallatin ku ndodhi ngjarja banon vajza e 45-vjeçares. Ky detaj po shqyrtohet nga policia, e cila po përpiqet të rindërtojë lëvizjet e gruas para ngjarjes.
Nga informacionet e deritanishme, nuk rezulton që dy viktimat të kenë qenë të martuar. Megjithatë, hetuesit po përpiqen të përcaktojnë marrëdhënien që ekzistonte mes tyre, si dhe motivin që mund të ketë çuar në krim.
Sipas dyshimeve paraprake, 45-vjeçarja kishte plagë nga të shtënat në trup dhe në fytyrë. Burri u gjet me një plagë në kokë.
Pranë trupit të tij u gjet edhe arma e zjarrit, një element që përforcon versionin e autoriteteve se ai, pasi qëlloi gruan, i dha fund jetës.
