“Rrufeja”, roboti humanoid i krijuar nga kompania kineze e telefonave inteligjentë Honor, ka regjistruar një kohë prej 9.32 sekondash në garën e 100 metrave, duke kaluar rekordin botëror të vendosur nga sprinteri xhamajkan Usain Bolt.
Të lidhura
None found
Performanca u zhvillua në një aktivitet provë për Lojërat e dyta Botërore të Robotikës Humanoide, të hapura në Pekin, dhe u bë publike nga transmetuesi shtetëror kinez.
Gjatë garimit, roboti arriti shpejtësinë maksimale prej 14.5 metrash në sekondë. Koha e tij ishte më e mirë se rekordi botëror i meshkujve, 9.58 sekonda, të cilin Usain Bolt e vendosi në Kampionatin Botëror të vitit 2009 në Berlin.
Ky rezultat vjen pas një tjetër paraqitjeje të suksesshme në muajin prill, kur “Rrufeja” triumfoi në Gjysmëmaratonën e Pekinit. Ai përshkoi 21 kilometrat për 50 minuta e 26 sekonda, kohë që, sipas raportimeve kineze, ishte më e shpejtë se rekordi botëror njerëzor për meshkuj në këtë garë.
Në atë kompeticion, roboti ishte 169 centimetra i gjatë, ndërsa këmbët i kishte 95 centimetra. Për përgatitjet ndaj Lojërave Botërore të Robotikës Humanoide, studiuesit ia zgjatën këmbët me 10 centimetra, duke i çuar në 1.05 metra.
Rezultati i fundit i “Rrufesë” shihet si një tjetër dëshmi e përparimit të robotëve humanoidë dhe e aftësisë së tyre për të imituar gjithnjë e më shumë lëvizjet njerëzore.
