Një seri sulmesh ruse me raketa goditi Kievin dhe zonat përreth në orët e para të së enjtes, duke shkaktuar vdekjen e të paktën 16 personave dhe plagosjen e më shumë se 30 të tjerëve.
Të lidhura
None found
Sipas Shërbimit Shtetëror të Emergjencave të Ukrainës, gjatë natës u dëmtuan ndërtesa banimi dhe magazina në pjesë të ndryshme të qytetit. Sulmet ndodhën në një kohë kur Ukraina po përballet me mungesë të raketave për sistemet e mbrojtjes ajrore.
Autoritetet vendase bënë të ditur se mes objekteve të prekura ishin edhe një spital për fëmijë dhe një shkollë. Presidenti ukrainas, Volodimir Zelensky, deklaroi se humbjet e jetëve lidhen me mungesën e municioneve për mbrojtjen ajrore, të cilat Kievi i merr nga aleatët perëndimorë.
“U bëj thirrje aleatëve tanë, madje u lutem atyre, të na sigurojnë sisteme për mbrojtjen nga raketat me rreze të gjatë veprimi. Sistemet “Patriot” janë ideale për të ndalur këto sulme të përgjakshme të Rusisë”, tha Zelensky.
Ndërkohë, Rumania njoftoi të enjten se një dron kishte kaluar në territorin e saj përmes kufirit verior me Ukrainën, çka bëri që të aktivizoheshin sirenat e alarmit ajror.
Edhe ushtria polake deklaroi se kishte vënë në zbatim “operacione mbrojtëse” për sigurinë e hapësirës së saj ajrore, pasi Polonia ka një pjesë të kufirit juglindor me Ukrainën.
