Viti i ri shkollor në Kosovë do të hapet pa vonesa, më 1 shtator.
Të lidhura
None found
Sindikata e Bashkuar e Arsimit, Shkencës dhe Teknologjisë (SBAShK) ka siguruar se arsimtarët janë plotësisht të përgatitur për fillimin e mësimit.
Megjithatë, me afrimin e datës së fillimit, sindikata ka ngritur zërin për një problem të vazhdueshëm prej vitesh. Ymer Ymeri, sekretari i SBAShK-ut, shprehu habi ndaj pretendimeve në disa komuna se një pjesë e mësuesve po trajtohen si “tepricë teknologjike”.
Sipas tij, ky etiketim është i pakuptueshëm, veçanërisht në ato komuna ku vazhdimisht hapen konkurse për mësues dhe pranohen staf të rinj. Ai lë të kuptohet se qëllimi i vërtetë mund të jetë heshtja e zërave kritikë.
Në lidhje me ecurinë e procesit mësimor, Ymeri konfirmoi se, sipas të dhënave që disponon sindikata, të gjitha institucionet arsimore janë gati për të mirëpritur nxënësit. Mësimdhënësit e përfaqësuar prej tyre tashmë kanë filluar të paraqiten nëpër shkolla, ndërsa në pjesën më të madhe të objekteve përgatitjet kanë përfunduar. Në disa shkolla të tjera, punimet rinovuese janë në fazën finale, duke lënë të kuptohet se mësimi do të nisë sipas planit.
Kreu sindikal shprehu gjithashtu shpresën për një proces të qetë të subvencionimit të teksteve mësimore, duke shtuar se nxënësit nuk duhet të përballen me vonesa në pajisjen me librat e nevojshëm.
Ai mbylli çdo spekulim mbi një veprim të mundshëm grevist nga ana e sindikatës, duke shprehur besimin se kërkesat e tyre do të shqyrtohen seriozisht nga autoritetet qendrore.
Edhe Ministria e Arsimit ka dhënë garanci të ngjashme, duke konfirmuar për Klankosova.tv se data e 1 shtatorit mbetet e pandryshuar për nisjen e mësimit.
Nga ana tjetër, Këshilli i Prindërve ka përsëritur shqetësimet dhe pakënaqësitë e tij, veçanërisht për mënyrën sesi po realizohet subvencionimi i librave, si dhe për kërkesa të tjera që, sipas tyre, janë injoruar nga Ministria e Arsimit dhe Shkencës.
