Nafta në bursat ndërkombëtare ka vijuar rritjen, duke kaluar përsëri mbi 91 dollarë për fuçi dhe duke shënuar vlerën më të lartë që prej fundit të korrikut.
Të lidhura
None found
Brent-i, standardi kryesor i tregut botëror, u kuotua rreth 91 dollarë për fuçi, ndërsa WTI amerikane iu afrua nivelit të 85 dollarëve. Këto lëvizje ndodhën në një klimë tensionesh të forta mes Shteteve të Bashkuara dhe Iranit, teksa mundësitë për një marrëveshje të shpejtë që do të mundësonte rihapjen e Ngushticës së Hormuzit po pakësohen.
Huthët e Jemenit, të mbështetur nga Irani, deklaruan se kishin goditur një rafineri të Saudi Aramco-s në pjesën jugperëndimore të Arabisë Saudite. CNN nuk ka arritur ta konfirmojë në mënyrë të pavarur këtë pretendim, ndërsa autoritetet saudite ende nuk kanë reaguar.
Pasiguria u shtua edhe pas raportimit se një anije ishte goditur nga një “predhë e panjohur” në Ngushticën e Hormuzit. Sipas Iranit, kjo rrugë strategjike do të vazhdojë të jetë e bllokuar. Teherani ka paraqitur disa kushte për hapjen e saj, përfshirë heqjen e sanksioneve amerikane ndaj naftës iraniane, si dhe ndalimin e kërcënimeve dhe operacioneve ushtarake.
Tregjet kanë reaguar ndaj kësaj situate të pasigurt, ndërsa analistët vlerësojnë se çmimet e naftës mund të mbeten në nivele të larta në rast se ngushtica nuk hapet dhe tensionet rajonale vijojnë.
