Lumir Abdixhiku, kryetar i Lidhjes Demokratike të Kosovës (LDK), njoftoi pas mbledhjes së grupit parlamentar se partia e tij nuk do të kërkojë më përfshirjen në qeveri dhe as postin e presidentit.
Të lidhura
None found
Sipas Abdixhikut, pretendimi i LDK-së për pozitën e presidentit synonte krijimin e një balance mes institucioneve të vendit.
Ai tha se Lëvizja Vetëvendosje (LVV) i kishte ofruar LDK-së vetëm tri ministri dhe postin e zëvendëskryeministrit, duke e përshkruar rolin e propozuar në qeveri si “dekorativ”.
“Oferta e Vetëvendosjes parashihte që LDK-ja të kishte një prani thjesht dekorative në qeveri, me vetëm tri ministri dhe zëvendëskryeministrin. Një nënshtrim të tillë nuk e pranuam”, deklaroi Abdixhiku.
Kreu i LDK-së pretendoi se, pasi partia e tij nuk i pranoi këto kushte, LVV-ja nisi një përballje publike kundër saj.
“Besimi është themeli mbi të cilin krijohen koalicionet”, u shpreh ai.
Në mbyllje, Abdixhiku konfirmoi tërheqjen e LDK-së nga të gjitha kërkesat për të qenë pjesë e ekzekutivit, si dhe nga pretendimi për postin e presidentit.
“LDK-ja nuk kërkon më pjesëmarrje në qeveri dhe tërhiqet nga kërkesa për presidentin. LVV-ja nuk do ta përdorë LDK-në si dekor. LDK-ja do të mbetet në opozitë”, deklaroi Abdixhiku.
