Eklipsi diellor që do të ndodhë më 12 gusht pritet të jetë një dukuri e veçantë qiellore, por vëzhgimi i tij pa masa të përshtatshme mbrojtëse mund të dëmtojë shikimin përkohësisht ose përgjithmonë.
Të lidhura
None found
Mjekët sqarojnë se intensiteti i rrezeve të Diellit nuk ulet gjatë eklipsit. Për këtë arsye, syzet e zakonshme të diellit nuk janë të mjaftueshme për të mbrojtur sytë.
Shikimi i drejtpërdrejtë i Diellit pa mbrojtje mund të çojë në retinopati diellore, e njohur gjithashtu si “verbëri nga eklipsi”, një dëmtim serioz i retinës.
Ky dëmtim mund të jetë i kthyeshëm ose i përhershëm dhe, duke qenë se nuk shoqërohet me dhimbje, shenjat e para mund të vërehen vetëm pas disa orësh apo edhe pas disa ditësh.
Ekspertët paralajmërojnë se nuk ofrojnë siguri as xhamat e nxirë, filmat radiografikë, filtrat e improvizuar apo syzet e zakonshme të diellit.
Për të parë eklipsin në mënyrë të sigurt duhen përdorur syze të certifikuara sipas standardit ISO 12312-2. Ato duhet të vendosen përpara se shikimi të drejtohet nga Dielli dhe të mbahen gjatë gjithë vëzhgimit.
Çdo shqetësim pas eklipsit, përfshirë edhe turbullimin e shikimit apo probleme të tjera vizuale, kërkon konsultë të menjëhershme me një okulist. Fëmijët dhe adoleshentët konsiderohen veçanërisht të rrezikuar, pasi sytë e tyre janë më të ndjeshëm.
Prindërit këshillohen t’i mbajnë nën vëzhgim fëmijët gjatë gjithë kohës dhe të kontrollojnë nëse ata përdorin syzet e posaçme. Në rrezik më të madh janë edhe të moshuarit, personat me sëmundje të syve dhe ata që i janë nënshtruar ndërhyrjeve kirurgjikale okulistike.
