Kolumbia u godit këtë të hënë nga një tërmet i fuqishëm me magnitudë 7.4 ballë, i cili shkaktoi dhjetëra viktima dhe të plagosur.
Të lidhura
None found
Kryebashkiaku i Pereira-s, Mauricio Salazar, deklaroi se në disa ndërtesa të shembura ka ende persona të bllokuar. Në Quibdó, ndërkohë, raportohet se katër persona kanë mbetur nën rrënojat e një ndërtese katërkatëshe.
Lëkundjet shkaktuan dëme të konsiderueshme në qytete të ndryshme të Kolumbisë dhe u ndjenë edhe në Venezuelën fqinje. Pamjet e regjistruara në Cali, rreth 200 kilometra në jugperëndim të Manizales, pasqyrojnë përmasat e shkatërrimeve.
Një prej videove tregon shembjen e fasadës së një qendre të EPS Sanitas, ofrues i shërbimeve shëndetësore në Kolumbi, mbi ambulancat e parkuara në një rrugë të frekuentuar. Në pamje të tjera shihet se pesë nga gjashtë katet e një krahu të Spitalit Universitar Valle Evaristo García janë shembur.
Ekipet e emergjencës dhe autoritetet kanë nisur verifikimin e ndërtesave të dëmtuara, ndërsa vijojnë kërkimet për njerëz që mund të ndodhen nën rrënoja.
Në Manizales, kryeqyteti i rajonit Caldas, shkollat dhe universitetet kanë pezulluar të gjitha mësimet. Ky qytet ndodhet më pak se 100 kilometra larg epiqendrës së tërmetit. Zyra e kryetarit të bashkisë u ka kërkuar institucioneve arsimore dhe nxënësve të ndjekin kanalet zyrtare për çdo njoftim të ri.
Shtetet e Bashkuara thanë se po e “monitorojnë nga afër” situatën dhe se janë të gatshme të ndihmojnë Kolumbinë. Sekretari amerikan i Shtetit, Marco Rubio, u kërkoi qytetarëve amerikanë në Kolumbi të regjistrojnë praninë e tyre online pranë Departamentit të Shtetit dhe të ndjekin burimet zyrtare për informacionet e fundit.
Presidenti i Kolumbisë, Abelardo De La Espriella, ka marrë drejtimin personal të koordinimit të reagimit qeveritar ndaj katastrofës. Ai njoftoi ngritjen e një Poste të Komandës së Bashkuar, e cila do të koordinojë operacionet e shpëtimit dhe ndihmën për personat e prekur. Gjithashtu, presidenti bëri të ditur se do të udhëtojë drejt Pereira-s për të ndjekur nga afër situatën dhe masat e ndërmarra nga autoritetet.
