Kolumbia u godit sot nga një tërmet i fuqishëm me magnitudë 7.4 ballë, i cili shkaktoi dëme në ndërtesa dhe la persona të lënduar.
Sipas Qendrës Sizmologjike Evropiane-Mesdhetare (EMSC), lëkundjet u regjistruan në një thellësi prej rreth 115 kilometrash. Agjencia Gjeologjike e Kolumbisë bëri të ditur se epiqendra ndodhej në provincën Chocó, përgjatë bregdetit të Paqësorit.
Të lidhura
None found
Goditja sizmike u ndje fuqishëm në Bogotá dhe Cali, ndërsa lëkundje u raportuan edhe në Venezuelë, Ekuador dhe Panama. Ndërkohë, Shërbimi Gjeologjik i Shteteve të Bashkuara (USGS) njoftoi se nuk kishte paralajmërim për cunami.
Banorët e zonave të prekura përjetuan momente paniku dhe u larguan me shpejtësi nga ndërtesat, nga frika e shembjeve dhe lëkundjeve pasuese. Copa betoni dhe xhami ranë në rrugë, ndërsa pamjet e para nga vendngjarja tregojnë qytetarë të tronditur duke u përpjekur të largohen nga zonat e rrezikshme.
Pas lëkundjeve, ekipet e emergjencës dhe qytetarët shkuan pranë ndërtesave të dëmtuara për të verifikuar nëse kishte persona të bllokuar ose të lënduar.
Dëme të konsiderueshme u evidentuan edhe në Katedralen Metropolitane, ku një pjesë e kupolës dyshohet se është shembur si pasojë e tërmetit.
Guvernatorja e provincës Chocó, Nubia Carolina Córdoba-Kouri, deklaroi se autoritetet janë të shqetësuara për mundësinë e lëkundjeve pasuese dhe se ka nisur vlerësimi i dëmeve.
“Sapo kemi përjetuar një tërmet të fortë në provincën e Chocó-s. Jemi të shqetësuar për lëkundjet pasuese. Edhe pse epiqendra ishte pranë San José del Palmar, ka të lënduar dhe dëme të konsiderueshme në ndërtesa në Quibdó”, deklaroi ajo.
