Policia ekuadoriane zbuloi të dielën tetë trupa të varrosur në mënyrë të fshehtë brenda një miniere të paligjshme në provincën jugore të Azuay.
Trupat ndodheshin rreth dy metra nën tokë dhe viktimat i kishin duart e lidhura. Në trupat e tyre u konstatuan dëmtime të rënda, mes tyre copëtim dhe prerje koke, të shkaktuara me hanxharë.
Të lidhura
None found
“Trupat ishin varrosur në një thellësi prej rreth dy metrash”, deklaroi për mediat Pablo Iga, oficer i lartë i policisë gjyqësore.
Zbulimi u bë në zonën e Pukarës, ku nxjerrja e paligjshme e arit dhe bakrit është shtuar ndjeshëm gjatë viteve të fundit. Los Lobos (“Ujqërit”) konsiderohet banda kriminale që dominon këtë territor.
Autoritetet dyshojnë se viktimat ishin futur në dhe rreth dy ditë përpara se të zbuloheshin. Identiteti i tyre ende nuk është përcaktuar.
Forcat e policisë kishin mbërritur në këtë zonë të vështirë për t’u aksesuar pas raportimeve për të shtëna me armë. Gjatë kontrolleve, ato gjetën trupat e groposur në minierën e paligjshme.
Ndërkohë, banorë të zonës kanë njoftuar autoritetet për zhdukjen e të afërmve të tyre. Hetimet vijojnë për identifikimin e viktimave dhe zbardhjen e rrethanave të vrasjes.
Ngjarja ndodh në një periudhë kur Ekuadori po përjeton një nivel të lartë dhune të lidhur me veprimtarinë e bandave kriminale.
Edhe pse presidenti i krahut të djathtë, Daniel Noboa, ka shpallur “luftë” ndaj bandave dhe ka ndjekur një politikë kundër tyre, dhuna nuk është ndalur. Grupet kriminale po përplasen për kontrollin e rrugëve të trafikut të drogës dhe të veprimtarive minerare të paligjshme.
Azuay është një nga dhjetë provincat e Ekuadorit që ndodhen në gjendje të jashtëzakonshme që prej qershorit, për shkak të shtimit të dhunës me armë.
Dikur i cilësuar si një ndër vendet më të qeta të Amerikës Latine, Ekuadori është përballur vitet e fundit me rritje të fortë të kriminalitetit. Sipas të dhënave të InSight Crime, në vitin 2025 shkalla e vrasjeve arriti në 51 për 100 mijë banorë, niveli më i lartë në Amerikën e Jugut.
