Maui në Hawaii është tronditur nga vrasja brutale e një roje sigurie 63-vjeçare brenda një resorti plazhi.
Nën dyshimin për krimin ndodhet Legend Storer, një student dhe kampion noti 20-vjeçar. Autoritetet thonë se kamerat e sigurisë e kanë filmuar atë duke lëvizur i zhveshur në ambientet e resortit në orët e para të mëngjesit.
Të lidhura
None found
Nga të dhënat e hetimit rezulton se, rreth orës 1:45 të mëngjesit, Storer u drejtua për në zyrën e sigurisë. Aty po kalonte pushimin e turnit 63-vjeçari i identifikuar si Dyer.
Sipas dyshimeve të policisë, 20-vjeçari e hapi zyrën me forcë dhe sulmoi rëndë rojën, duke përdorur edhe një enë të madhe uji me kapacitet afërsisht 19 litra. Dyer humbi jetën për shkak të plagëve të pësuara.
Një prej kolegëve të viktimës tha se ai ishte një person shumë i dashur dhe gëzonte respektin e të tjerëve.
“Ai ishte një person i mrekullueshëm. Ai thjesht ishte ulur në tavolinën e tij duke ngrënë një hamburger me djathë gjatë pushimit”, u shpreh kolegu. Ai tregoi gjithashtu se Dyer ishte i martuar dhe bashkëshortja e tij punonte në një restorant të zonës.
Pas ngjarjes, Storer dyshohet se doli nga resorti pa u vënë re. Afërsisht dy orë më pas, banorë të zonës telefonuan policinë disa herë për të njoftuar se një burrë lakuriq po endej në një lagje pranë resortit.
Dëshmitarët thanë se i riu bërtiste pa pushim shprehje me përmbajtje fetare.
Një banor vendas rrëfeu: “Dëgjova një burrë duke bërtitur: ‘Jezusi të do. Jezusi jam unë. Unë jam Jezusi’. Ai vazhdoi ta përsëriste vazhdimisht, ndoshta 15 herë”.
Oficerët e lokalizuan Storer me gërvishtje në trup, ndërsa më pas ai u transportua në spital për një vlerësim.
Rreth orës 5:30 të mëngjesit, autoritetet zbuluan në zyrën e resortit trupin e pajetë të rojës së sigurisë.
Policia deklaroi se lidhja e 20-vjeçarit me vrasjen doli në pah pas analizimit të regjistrimeve të kamerave. Pamjet dyshohet se tregojnë lëvizjet e tij nëpër resort, si dhe momentin kur ai hyri në zyrën ku gjendej viktima.
Legend Storer është student dhe atlet në Universitetin Concordia Irvine në Kaliforni, ndërsa tashmë ndaj tij janë ngritur akuza të rënda.
20-vjeçari akuzohet për vrasje të shkallës së dytë, vjedhje me thyerje me një objekt të rrezikshëm dhe ekspozim të pahijshëm.
Gjatë daljes së parë para gjykatës, Storer deklaroi se ishte i pafajshëm. Kërkesa për lirimin e tij me kusht u refuzua dhe ai vazhdon të mbahet në paraburgim në Qendrën Korrektuese Maui. Ndërkohë, hetuesit po punojnë ende për të sqaruar motivin dhe rrethanat e ngjarjes.
