Një pacient nga Shkupi, i cili ka pësuar lëndim të boshtit kurrizor, është transferuar në mënyrë të sigurt nga Turqia dhe është pranuar në Klinikën Universitare për TOARILUC. Sipas Ministrisë së Shëndetësisë, transporti u realizua falë reagimit të shpejtë dhe bashkërendimit ndërmjet MSH-së, Qeverisë, Shërbimit për Punë të Përgjithshme dhe të Përbashkëta dhe ekipeve mjekësore.
Të lidhura
None found
Lëndimi ka ndodhur gjatë një incidenti në një rrëshqitëse uji, në kohën kur pacienti po qëndronte për pushime në vendpushimin turk të Kushadasit. Më 23 korrik, ai iu nënshtrua një ndërhyrjeje kirurgjikale në një spital lokal, ku vazhdoi të trajtohej deri në transferimin e tij në vend.
MSH-ja bëri të ditur se, për shkak të natyrës serioze të lëndimit dhe rekomandimit të mjekëve turq, u angazhua menjëherë për koordinimin e institucioneve kompetente dhe atyre shëndetësore. Në bashkëpunim me Qeverinë dhe Shërbimin për Punë të Përgjithshme dhe të Përbashkëta, u sigurua transporti mjekësor ajror me aeroplanin qeveritar. Ministria e cilësoi këtë operacion të ndërlikuar mjekësor si dëshmi të rëndësisë së bashkëpunimit institucional të shpejtë dhe efikas për mbrojtjen e jetës dhe shëndetit të qytetarëve.
Gjatë gjithë procesit, Ministria e Shëndetësisë mbajti komunikim të pandërprerë me institucionet dhe ekipet mjekësore të angazhuara. Synimi ishte që pacienti të sillej në vend në kohën më të shkurtër të mundshme dhe në kushte të sigurta, si dhe t’i mundësohej vazhdimi i trajtimit.
Drejtori i Klinikës, dr. Igor Merxhanovski, deklaroi se kolegët kishin kërkuar transport ajror për shkak të rëndësisë së lëndimit dhe nevojës për një transferim të shpejtë e të sigurt. Ai shprehu mirënjohje ndaj Ministrisë së Shëndetësisë, Qeverisë dhe Shërbimit për Punë të Përgjithshme dhe të Përbashkëta për reagimin në kohë dhe përkrahjen gjatë organizimit të transportit.
Për marrjen e pacientit, drejt Turqisë u nis një ekip profesional mjekësor nën udhëheqjen e drejtueses së KARIL-it, dr. Marta Treneva. Deri në mbërritjen në Shkup, ekipi i ofroi pacientit kujdes të vazhdueshëm dhe mbikëqyrje mjekësore gjatë tërë udhëtimit.
Pas përfundimit me sukses të transportit, pacienti u vendos në Repartin e Mjekimit Intensiv pranë Klinikës për TOARILUC, ku do të vijojë trajtimin.
Dr. Merxhanoski theksoi se gjendja shëndetësore e pacientit kërkon mjekim intensiv. Dokumentacioni mjekësor tashmë është analizuar, ndërsa operacioni i realizuar në Turqi është vlerësuar si i përshtatshëm dhe i kryer në mënyrë profesionale. Sipas tij, lëndimet e boshtit kurrizor janë ndër dëmtimet më serioze dhe kërkojnë përcjellje të kujdesshme, trajtim afatgjatë dhe qasje multidisiplinare.
Në periudhën që vijon janë planifikuar ekzaminime plotësuese, rezultatet e të cilave do të përcaktojnë hapat e mëtejshëm të mjekimit dhe rehabilitimit. Në varësi të gjendjes shëndetësore të pacientit, parashihet edhe terapi fizikale në qendrën spinale në vend.
