Një grua 82-vjeçare dhe një burrë 44-vjeçar janë gjetur të vdekur brenda një apartamenti në Portici, në provincën e Napolit. Të dhënat paraprake tregojnë se viktimat ishin teze dhe nip.
Të lidhura
None found
Zbulimi u bë në një banesë në Piazzale Divina Provvidenza. Dyshohet se të dy kishin ndërruar jetë disa ditë përpara se trupat e tyre të gjendeshin.
Karabinierët dhe shërbimet e emergjencës shkuan menjëherë në vendngjarje, ndërsa nisën verifikimet për të përcaktuar rrethanat në të cilat kishte ndodhur ngjarja.
Autoritetet bënë të ditur se trupat, të cilët kishin nisur të dekompozoheshin, ndodheshin të shtrirë në dysheme pranë shtratit. Kontrolli fillestar nuk evidentoi shenja dhune mbi viktimat dhe as gjurmë që mund të tregonin hyrje me forcë në apartament.
Me vendim të autoriteteve gjyqësore, trupat u transportuan në morgun e Spitalit Policlinico të Napolit. Autopsia pritet të përcaktojë shkakun e vdekjes së tyre.
Hetuesit po shqyrtojnë çdo pistë dhe po vijojnë punën për të hedhur dritë të plotë mbi rastin. Sipas të dhënave të para, viktimat mund të kenë qëndruar në banesë për rreth pesë ditë deri në momentin kur u zbuluan.
