Jason Arday ka njoftuar dorëheqjen nga posti i profesorit në Universitetin e Kembrixhit, në një kohë kur ndaj tij janë ngritur akuza për plagjiaturë dhe deklarime të pasakta mbi kualifikimet akademike.
Të lidhura
None found
Vendimi i tij u bë publik pasi Universiteti i Kembrixhit deklaroi se kishte hapur një hetim të ri, pas marrjes së informacioneve të tjera që lidhen me formimin e tij akademik.
Arday, i cili në vitin 2023 u bë profesori më i ri me ngjyrë në historinë e Universitetit të Kembrixhit, ka pranuar se në disa prej punimeve të tij akademike ka pasur gabime. Megjithatë, ai e ka mohuar prerazi se ka mashtruar.
Profesori tha se për një kohë të gjatë ka qenë nën presionin e një fushate të pandërprerë sulmesh personale dhe ekspozimi të tepruar mediatik.
Në deklaratën për largimin e tij, Arday e përshkroi emërimin në Kembrixh si arritjen më të madhe profesionale të jetës, por nënvizoi se barra personale e krijuar nga kjo situatë ishte bërë e papërballueshme.
Sipas tij, dorëheqja nuk lidhet me ndonjë zhgënjim ndaj kërkimit shkencor apo parimeve të universitetit. Ai e cilësoi këtë hap si të vetmen rrugë për t’i dhënë fund një periudhe veçanërisht të vështirë.
Arday falënderoi studentët dhe kolegët për mbështetjen e dhënë, ndërsa tha se i nevojitet kohë për t’u rimëkëmbur. Ai shtoi se synon të rikthehet në veprimtarinë akademike në të ardhmen.
Polemika rreth tij shpërtheu pasi studiuesi amerikan Nathan Cofnas publikoi pretendime se disa pjesë të tezës së doktoraturës së Arday përmbanin pasazhe të marra nga burime të tjera, me vetëm ndryshime të vogla.
Universiteti Liverpool John Moores, institucioni që i dha doktoraturën në vitin 2015, kishte zhvilluar më herët një hetim për akuza të ngjashme. Në përfundim, ai nuk gjeti prova të mjaftueshme për të vërtetuar pretendimet për plagjiaturë.
Gjatë një interviste të fundit, Arday pranoi se disa pasaktësi në punimet e tij të para janë të vërteta dhe mori përgjegjësi për to, por insistoi se nuk është gënjeshtar.
Ai deklaroi gjithashtu se, që nga emërimi në Kembrixh, ka qenë në shënjestër të një fushate të organizuar që synonte largimin e tij nga posti. Sipas tij, sulmet mund të kenë motive racore dhe lidhen me debatet mbi politikat e diversitetit, barazisë dhe përfshirjes në universitete.
Profesori ka treguar se autizmi ndikoi në mënyrën se si mësonte dhe përpunonte informacionin gjatë viteve të para të karrierës. Ai beson se kjo mund të ketë kontribuar në disa gabime të bëra në citime dhe referenca.
Përveç çështjes së plagjiaturës, janë ngritur pikëpyetje edhe për disa pretendime personale të Arday, mes tyre sfida sportive dhe shumat e konsiderueshme të mbledhura për bamirësi.
Ai ka shpjeguar se paratë u mblodhën gjatë një periudhe 20-vjeçare, me kontributin e shumë personave të tjerë. Po ashtu, ka thënë se disa rekorde sportive janë pasqyruar gabimisht në publik.
Universiteti i Kembrixhit ka konfirmuar se po shqyrton jo vetëm kualifikimet e profesorit, por edhe ankesa të tjera që lidhen me sjellje të mundshme të pahijshme në kërkimin shkencor, në përputhje me rregullat e institucionit. Një procedurë e veçantë është hapur paralelisht edhe nga Kolegji Jesus, ku Arday ishte anëtar.
Shtëpia botuese Simon & Schuster, e cila pritet të nxjerrë këtë muaj autobiografinë e Arday, ka deklaruar se vijon ta mbështesë profesorin. Botuesi ka vlerësuar profesionalizmin dhe integritetin e tij gjatë periudhës së bashkëpunimit.
Disa profesorë kanë kritikuar universitetet elitare, duke pretenduar se emërime të tilla janë ndikuar nga synimi për të promovuar diversitetin dhe për të përmirësuar imazhin publik. Akademikë të tjerë e kanë kundërshtuar këtë qëndrim, duke argumentuar se studiuesit me ngjyrë përballen me pengesa të shumta dhe nuk trajtohen në mënyrë të privilegjuar në institucionet e arsimit të lartë.
