Një numër i madh përdoruesish të WhatsApp-it nga vende të ndryshme të botës kanë njoftuar se u është ndërprerë papritur qasja në llogaritë e tyre.
Të lidhura
None found
Disa prej të prekurve raportojnë se bllokimi ka ndodhur pa asnjë paralajmërim, ndërsa të tjerë thonë se janë njoftuar për pezullimin e llogarisë për shkak të aktiviteteve të konsideruara të dyshimta.
Meta, kompania që zotëron aplikacionin, e ka konfirmuar problemin dhe ka bërë të ditur se po zhvillon hetime për të gjetur një zgjidhje.
Shkaku i kësaj vale bllokimesh mbetet ende i paqartë. Megjithatë, dyshimet janë përqendruar te sistemet automatike të sigurisë së WhatsApp-it, të përdorura për evidentimin e spam-it, keqpërdorimeve dhe veprimtarive të pazakonta.
Kompania ka filluar përpjekjet për të përcaktuar burimin e problemit dhe për t’ua rikthyer qasjen përdoruesve të prekur. Meta ka udhëzuar personat, llogaritë e të cilëve mund të jenë bllokuar gabimisht, që të zbatojnë procedurat zyrtare të verifikimit.
Me miliarda përdorues, WhatsApp renditet mes aplikacioneve të komunikimit më të përdorura në nivel botëror. Për këtë arsye, problemet me llogaritë apo ndërprerjet e shërbimit mund të ndikojnë si në komunikimin personal, ashtu edhe në atë të biznesit në mbarë globin.
