Jesse Bisiwu ka folur për ndjesitë e para pas kalimit te Barcelona, duke e përshkruar transferimin te klubi katalanas si përmbushjen e një dëshire që e kishte që në fëmijëri.
Të lidhura
None found
Futbollisti 18-vjeçar u prezantua në krah të presidentit Joan Laporta dhe, në intervistën e tij të parë për kanalet zyrtare të klubit, vlerësoi pritjen që i është bërë në ambientet e Barcelonës.
Bisiwu tha se ditët e para kanë qenë shumë pozitive dhe se është ndier menjëherë pjesë e një familjeje të jashtëzakonshme. Ai shtoi se mirësjellja e të gjithëve e ka ndihmuar të përshtatet shpejt.
“Ditët e para kanë qenë fantastike. Jam mirëpritur nga një familje e mrekullueshme dhe jam shumë mirënjohës për këtë. Të gjithë kanë qenë shumë miqësorë dhe më kanë bërë të ndihem mirë”, deklaroi ai.
Talenti i ri nuk e fshehu kënaqësinë që tani vesh fanellën e një ekipi që e kishte admiruar prej vogëlisë.
“Kur isha i vogël gjithmonë ëndërroja të luaja për një klub të madh si Barça. Të jem këtu sot është një ëndërr e realizuar për mua”, u shpreh Bisiwu.
Ai bëri të ditur gjithashtu se ka zhvilluar disa biseda me trajnerin Hansi Flick. Sipas Bisiwut, tekniku gjerman i ka treguar qartë se puna dhe mësimi duhet të jenë prioritetet e tij gjatë sezonit të ri.
“Hansi më ka mirëpritur shumë mirë. Kemi biseduar disa herë dhe është shumë e qartë se çfarë duhet të bëj këtë vit: të punoj shumë dhe të mësoj sa më shumë”, tha talenti i Barcelonës.
Bisiwu premtoi se do të jetë maksimalisht i angazhuar sa herë që t’i jepet mundësia të luajë me ekipin e parë.
“Kur trajneri të ketë nevojë për mua, unë do të jem gati. Dua vetëm të punoj fort dhe të jem i përgatitur. Do të jap gjithçka për këtë stemë”, përfundoi Bisiwu.//
