Pas një rënieje të ndjeshme në nisje të javës, çmimet ndërkombëtare të naftës u rikthyen në rritje këtë të mërkurë. Investitorët po ndjekin me shqetësim situatën rreth rihapjes së Ngushticës së Hormuzit, si dhe zhvillimet e reja në Detin e Kuq.
Të lidhura
None found
Brent-i, treguesi kryesor i tregut global, u rrit me 1.3% dhe arriti rreth 80 dollarë për fuçi. Në të njëjtën kohë, nafta amerikane WTI shënoi një rritje prej 0.6%, duke u tregtuar pranë nivelit të 76 dollarëve për fuçi.
Kjo tendencë u shfaq edhe pse presidenti amerikan Donald Trump deklaroi se marrëveshja për hapjen e Ngushticës së Hormuzit mund të bëhet publike së shpejti. Megjithatë, mediat shtetërore iraniane kanë shprehur skepticizëm lidhur me mundësinë e një rihapjeje të menjëhershme.
Vëmendja është përqendruar gjithashtu te Bab al-Mandeb, një prej rrugëve detare më të rëndësishme për transportin e naftës. Rebelët Huthi, të mbështetur nga Irani, kanë paralajmëruar se mund të pengojnë lundrimin në këtë ngushticë, duke shtuar frikën për furnizimet globale.
Ekspertët vlerësojnë se një pengesë në qarkullimin detar përmes Detit të Kuq do t’ia ngushtonte Arabisë Saudite mundësitë alternative për eksportin e naftës dhe do të krijonte presion shtesë mbi tregjet.
Rebelët Huthi kanë deklaruar ndërkohë se kanë goditur një cisternë saudite nafte në Detin e Kuq. Autoritetet indiane njoftuan gjithashtu se një anije me flamur indian u sulmua dhe u fundos pranë brigjeve të Jemenit, duke thelluar pasigurinë në një nga arteriet kryesore të tregtisë globale.
