Një 38-vjeçar është arrestuar pranë fushës së golfit të Presidentit amerikan Donald Trump në Rancho Palos Verdes, Kaliforni, disa ditë përpara mbërritjes së tij në zonë për një darkë të Partisë Republikane, e organizuar për mbledhje fondesh.
Të lidhura
None found
Jeanine John Taele u pa duke lëvizur në fushën e golfit, ku fotografonte dhe filmonte, ndërsa dukej se po vëzhgonte masat e sigurisë. Sipas Departamentit të Sherifit të Los Anxhelosit, arrestimi u krye të dielën pas njoftimit të dhënë nga agjentë federalë civilë.
Gjatë kontrollit, autoritetet konstatuan se Taele ishte gjithashtu person i kërkuar në kuadër të një hetimi për grabitje nga Departamenti i Policisë së El Segundo.
Policia i gjeti një karikator me 16 fishekë me municion të ndaluar, ndërsa në automjetin e tij u sekuestruan një pistoletë e mbushur dhe municione të tjera. Për këto fakte, ai përballet me akuza për mbajtje të fshehur të armës së zjarrit dhe posedim të municioneve të ndaluara.
Të nesërmen, agjentë të FBI-së dhe të Task Forcës së Përbashkët Kundër Terrorizmit ushtruan kontroll në banesën e tij në Downey. Aty u gjetën një pushkë e modifikuar në mënyrë të paligjshme e tipit AR, një pistoletë kalibri .45, jelekë antiplumb, karikatorë me kapacitet të lartë, sasi të konsiderueshme municionesh dhe fletore me përmbajtje që zyrtarët e konsideruan shqetësuese.
Hetimi po kryhet në bashkëpunim me Shërbimin Sekret të SHBA-së dhe autoritetet nuk e përjashtojnë mundësinë e akuzave të reja. Megjithatë, zyrtarët thanë se deri tani nuk është konstatuar ndonjë kërcënim i besueshëm për komunitetin dhe nuk ka prova se i dyshuari po përgatiste një sulm ndaj Presidentit Trump.
Ngjarja ndodhi përpara vizitës së Trumpit në Kaliforni, ku presidenti pritet të marrë pjesë në një aktivitet për mbledhje fondesh dhe më pas të udhëtojë drejt Las Vegasit. Vizita zhvillohet në një kohë kur angazhimet politike po shtohen në prag të zgjedhjeve të mesit të mandatit në SHBA.
