Ministrat e Brendshëm të Bashkimit Evropian do të zhvillojnë të martën një videokonferencë urgjente për të diskutuar fluksin e emigrantëve në enklavën spanjolle të Ceutës.
Të lidhura
None found
Takimi vjen pas hyrjes kaotike të dhjetëra mijëra emigrantëve nga Maroku në Ceuta gjatë javës së kaluar, ngjarje që ka tensionuar marrëdhëniet mes disa prej 27 vendeve anëtare të BE-së.
Presidentja e Komisionit Evropian, Ursula von der Leyen, i ka deklaruar kryeministrit spanjoll Pedro Sánchez se mbrojtja e kufijve të jashtëm është një “përgjegjësi e përbashkët evropiane”. Në një letër drejtuar atij, ajo vlerësoi “menaxhimin e shpejtë” të situatës së krijuar.
Megjithatë, von der Leyen theksoi se ngjarjet e fundit tregojnë nevojën për masa të mëtejshme në pikat më kritike kufitare. Ajo kërkoi “monitorim vigjilent” dhe përdorimin e barrierave fizike kur një gjë e tillë vlerësohet e nevojshme.
Sipas presidentes së Komisionit Evropian, videokonferenca e së martës duhet të shërbejë edhe për nxjerrjen e “mësimeve” nga zhvillimet në Ceuta. Përballë emigracionit të paligjshëm, ajo kërkoi “një përgjigje të përbashkët evropiane, veprim të bashkuar dhe solidaritet”.
Von der Leyen sugjeroi gjithashtu se Brukseli mund t’i ofrojë më shumë mbështetje Marokut dhe i bëri thirrje BE-së të “intensifikojë përpjekjet” në pesë drejtime: parandalimin e emigracionit të parregullt përmes bashkëpunimit me vendet partnere; forcimin e kufijve të jashtëm; krijimin e sistemeve të paralajmërimit të hershëm; goditjen e rrjeteve të kontrabandës së emigrantëve; si dhe forcimin e procedurave të kthimit.
