Vala e të nxehtit që ka përfshirë Europën po shton shqetësimet për funksionimin e centraleve bërthamore.
Të lidhura
None found
Në Rumani, autoritetet zhvilluan një ndërhyrje të pazakontë për të siguruar ujin e nevojshëm për ftohjen e centralit bërthamor të Cernavodës, i cili furnizohet nga Danubi.
Forcat Detare rumune kryen një shpërthim të kontrolluar nën ujë, me qëllim çlirimin e një mase shkëmbore që pengonte rrjedhën drejt Degës së Vjetër të Danubit dhe centralit.
Operacioni përfshiu përdorimin e rreth 180 kilogramëve eksploziv. Synimi ishte rritja e sasisë së ujit që mbërrin në impiant, pasi niveli i Danubit ka pësuar rënie të ndjeshme për shkak të vapës së zgjatur, shkruan Guardian.
Ministri i Përkohshëm i Mbrojtjes, Radu Miruță, deklaroi se ndërhyrja ishte e suksesshme. Sipas tij, ajo do të kontribuojë në ftohjen e centralit dhe do të lehtësojë gjithashtu lundrimin në lumë.
Radu Miruță paralajmëroi se vazhdimi i kushteve ekstreme atmosferike mund ta detyrojë centralin të ndalojë përkohësisht veprimtarinë, për të garantuar sigurinë. Ai shtoi se çdo ditë funksionimi të mëtejshëm të impiantit ka një vlerë shumë më të lartë se kostoja e ndërhyrjes me eksploziv.
Autoritetet rumune nuk kanë bërë të ditur ndonjë rrezik të menjëhershëm për një aksident bërthamor apo për shpërthimin e centralit.
Megjithatë, pamjaftueshmëria e ujit për sistemin e ftohjes mbetet një problem serioz për funksionimin e sigurt të centraleve bërthamore. Për këtë arsye, ndërhyrja u vlerësua si e nevojshme për të parandaluar pezullimin e parakohshëm të aktivitetit.
