Ceuta po përballet me një krizë migratore dramatike, pasi rreth 60 mijë persona kanë kaluar nga Maroku drejt enklavës spanjolle. Gjatë tentativave për të kapërcyer kufirin janë regjistruar të paktën 34 viktima.
Të lidhura
None found
Juan Jesus Vivas, presidenti rajonal, tha se kapacitetet e pritjes janë tejkaluar tërësisht dhe se qyteti nuk është në gjendje ta përballojë këtë nivel presioni. Ndërkohë, kryeministri i Spanjës, Pedro Sanchez, ia atribuoi fluksin e befasishëm veprimtarisë së rrjeteve të trafikantëve. Ai deklaroi se grupet kriminale përhapën informacione të pavërteta, duke interpretuar gabimisht një vendim të fundit të Gjykatës së Lartë spanjolle.
Në vendimin në fjalë përcaktohej se emigrantët që mbërrijnë në mënyrë të paligjshme përmes detit nuk i nënshtrohen kthimit të menjëhershëm. Presidentja e Komisionit Europian, Ursula von der Leyen, i konsideroi “të papranueshme” skenat ku mijëra emigrantë shiheshin duke hyrë në qytetin spanjoll. Ajo theksoi se hyrja në Bashkimin Europian nuk mund të bëhet pa respektuar rregullat dhe bëri thirrje për ndalimin e menjëhershëm të kalimeve të rrezikshme, goditjen e rrjeteve të trafikantëve dhe përshpejtimin e kthimit të emigrantëve.
Në pjesën marokene të kufirit, gjatë përplasjeve të zhvilluara pranë vijës kufitare, policia arrestoi rreth 30 të rinj. Për të shpërndarë mijëra persona, kryesisht të rinj, që ishin grumbulluar me synimin për të kaluar kufirin, forcat e sigurisë përdorën gaz lotsjellës dhe ujë me presion.
Kancelari gjerman Friedrich Merz i bëri thirrje Marokut të rimarrë pa vonesë emigrantët që kanë hyrë ilegalisht në territorin spanjoll. Franca, nga ana tjetër, u shpreh e gatshme t’i japë Madridit të gjithë ndihmën e nevojshme, përfshirë edhe mbështetjen nëpërmjet Frontex-it. Presidenti Emmanuel Macron urdhëroi gjithashtu shtimin e kontrolleve përgjatë kufirit të Francës me Spanjën.
