Debati mbi rikthimin në sistemin e drejtësisë të gjyqtarëve dhe prokurorëve serbë që dhanë dorëheqje masive gjatë vitit 2022 ka nxitur një reagim të ashpër nga gazetari Gëzim Mekuli.
Të lidhura
None found
Përmes një shkrimi në platformat sociale, ai e përshkroi largimin e tyre si “një puç politik të koordinuar”, duke mohuar çdo karakter profesional të këtij veprimi. Sipas tij, kushdo që ka braktisur institucionet e Kosovës duke iu bindur direktivave të Beogradit, nuk ka vend më në gjykatat dhe prokuroritë e vendit.
Mekuli shprehu mbështetje të plotë për qëndrimin e mbajtur nga kryeministri Albin Kurti dhe ministrja në detyrë e Drejtësisë, Albulena Haxhiu, duke nënvizuar se gjyqtarët e Republikës së Kosovës kanë për detyrë të zbatojnë vetëm Kushtetutën e Kosovës. Njëkohësisht, ai sulmoi ashpër disa përfaqësues diplomatikë ndërkombëtarë, të cilët, sipas tij, po e trajtojnë si diçka normale kthimin e atyre që u larguan nga detyra me porosi të një shteti tjetër.
Në postimin e tij të plotë, Mekuli përdori tone prerëse dhe një gjuhë të drejtpërdrejtë. Ai argumentoi se një gjyqtar që ekzekuton urdhrat e Beogradit ka përqafuar rrugën politike dhe jo atë të drejtësisë, duke shtuar se dorëheqjet kolektive të vitit 2022 kishin për qëllim dobësimin dhe rraskapitjen e shtetit të Kosovës.
“Në asnjë demokraci serioze nuk rikthehesh në detyrë pasi ke braktisur institucionin me urdhër të një shteti tjetër,” shkroi ai, duke ngritur pyetjen retorike nëse një gjyqtar gjerman apo francez që largohet me urdhër nga Moska apo Berlini do të pranohej sërish në bankën e drejtësisë. Përgjigjja për të është e qartë: aspak.
Gazetari e cilësoi si të papranueshme sjelljen e disa ambasadorëve, të cilët, sipas tij, e paraqesin këtë situatë sikur gjyqtarët dhe prokurorët të ishin thjesht në leje lindjeje. “Drejtësia nuk është mashë e Beogradit,” theksoi ai, duke mbyllur me një qëndrim të prerë se kushdo që ka zgjedhur Beogradin dhe ka shkelur kushtetutën e Kosovës, duhet të vazhdojë karrierën e tij atje dhe jo në institucionet e Republikës.
