Jose Mourinho synon ta ndjekë nga afër zhvillimin e Arda Gulerit dhe ka hartuar një program të posaçëm për talentin turk në prag të sezonit 2026/27.
Të lidhura
None found
Futbollisti 21-vjeçar u paraqit të hënën në qendrën stërvitore të Valdebebas, duke nisur përgatitjet me Real Madridin pas pushimit të shkurtër që pasoi përfundimin e Kupës së Botës.
Nga lojtarët e skuadrës që ishin pjesë e turneut botëror, Guler është i pari që është vënë nën urdhrat e Mourinhos për fazën parasezonale.
Raportimet bëjnë të ditur se trajneri portugez e vlerëson prej kohësh reprezentuesin e Turqisë. Kur ishte në drejtimin e Fenerbahçes, Mourinho kishte kërkuar ta merrte atë në huazim, përpara transferimit të lojtarit te Real Madridi.
Tani, portugezi dëshiron të bashkëpunojë ngushtë me Gulerin, në mënyrë që 21-vjeçari të arrijë potencialin e tij të plotë dhe të shndërrohet në një prej futbollistëve kryesorë në “Santiago Bernabeu”.
Sigurimi i një vendi në formacion, sidoqoftë, pritet të jetë një sfidë. Transferimi i Bernardo Silvës e ka shtuar rivalitetin në repartin sulmues, ndërsa në sistemin 4-2-3-1 që preferon Mourinho, dy lojtarët parashikohet të konkurrojnë si për pozicionin e mesfushorit ofensiv, ashtu edhe për krahun e djathtë.
Guler vjen pas një sezoni mjaft pozitiv me Real Madridin, gjatë të cilit realizoi 14 asistime. Tetë prej këtyre pasimeve u finalizuan me gol nga Kylian Mbappe, një tregues i qartë i kontributit të turkut në lojën sulmuese.
