Sipas analistit politik Idriz Zeqiraj, Lëvizja Vetëvendosje disponon një bazë të gjerë anëtarësie dhe profesionistë të aftë për të marrë përgjegjësi të larta drejtuese, duke përfshirë edhe kreun e shtetit. Megjithatë, ai thekson se për shkak të strukturës së brendshme të partisë, shumica e këtyre figurave mbeten jashtë vëmendjes publike.
Të lidhura
None found
“Aktualisht, Vetëvendosja numëron mbi 30 mijë anëtarë dhe brenda saj ka individë që meritojnë pozita kyçe në pushtet dhe në institucionet shtetërore, madje edhe atë të Presidentit. Por LVV-ja ka një model organizimi të veçantë, me dalje të rralla në publik, për shkak të një sistemi të centralizuar, prandaj kuadrot e saj nuk janë fort të dukshëm në skenën publike”, u shpreh Zeqiraj.
Ai nënvizon se, edhe pse ligji themelor nuk e pengon partinë fituese të kontrollojë tre postet më të rëndësishme shtetërore, një skenar i tillë do të ishte në kundërshtim me parimet demokratike.
“Kur diskutohet se cili nga zyrtarët e LVV-së mund të marrë presidencën, unë besoj se kjo forcë politike duhet të kënaqet me drejtimin e qeverisë dhe të Kuvendit, si rrjedhojë e mandatit të fituar. Posti i Presidentit, nga ana tjetër, duhet t’i besohet opozitës. Edhe pse Kushtetuta nuk e ndalon, logjika dhe shëndeti demokratik kërkojnë që një nga tri funksionet kryesore të udhëhiqet nga opozita”, shtoi ai.
Zeqiraj gjithashtu mendon se kryeministri në detyrë Albin Kurti po përdor avantazhin e numrave në Kuvend për të diktuar procesin e zgjedhjes së presidentit të ardhshëm.
“LVV-ja, së bashku me partnerët Guxo, Alternativa dhe minoritetet joserbe, ka të siguruara 65 vota. Në këtë situatë, opozita praktikisht nuk ka asnjë shans për të konkurruar realisht, pasi epilogu është i paracaktuar”, vlerëson ai.
Duke folur për skenarët që do të shmangnin një cikël të ri zgjedhor, Zeqiraj shprehet se ligjvënësit e opozitës mund të vihen në pozitë që ta mbështesin procesin edhe pa dëshirën e tyre.
“Nëse qëllimi është që vendi të kursehet nga zgjedhjet e përsëritura, deputetët, ndonëse nuk janë të detyruar, mund të qëndrojnë në sallë për të mundësuar zgjedhjen e presidentit, duke e pranuar propozimin e kryeministrit”, deklaroi ai.
Sidoqoftë, në rast se kandidati për president do të dilte nga gjiri i Vetëvendosjes, Zeqiraj përmend një figurë që, sipas tij, i përmbush të gjitha standardet për këtë detyrë.
“Nëse presidenti do të ishte nga radhët e LVV-së, unë mendoj se profesori universitar Mazllum Baraliu do të ishte një zgjedhje e merituar. Ai ka shërbyer si kuadër i lartë në Gjykatën Kushtetuese dhe është një figurë e respektuar në sferën akademike, juridike dhe politike të Kosovës. Dallohet për analizat e thelluara kushtetuese dhe njihet si personalitet i matur, i ekuilibruar dhe i hapur ndaj qytetarëve e zyrtarëve, pa dallime partiake”, përfundoi Zeqiraj.
