Të paktën nëntë persona humbën jetën sot në Rripin e Gazës si pasojë e operacioneve izraelite, bëjnë të ditur burime mjekësore dhe të sigurisë. Në mesin e viktimave janë një fëmijë 10-vjeçar dhe një zyrtar i lartë i forcave të policisë së Hamasit.
Të lidhura
None found
Me këto humbje, numri i palestinezëve të vrarë që nga hyrja në fuqi e armëpushimit të tetorit midis palëve ka kaluar shifrën 1,100, sipas të dhënave të autoriteteve shëndetësore në enklavë.
Megjithëse marrëveshja i dha fund konfrontimeve të mëdha ushtarake, tensionet dhe episodet e dhunës nuk janë ndërprerë. Në të njëjtën periudhë, militantët në Gaza kanë vrarë katër ushtarë izraelitë.
Personeli mjekësor raporton se fëmija Muataz Abu Shaar u qëllua për vdekje nga trupat izraelite në zonën e Rafahut, në jug të Gazës.
Më tej në veri, në Jabalia, një bombardim ajror izraelit goditi një postë policore nën kontrollin e Hamasit. Si pasojë, të paktën shtatë individë, përfshirë një grua shtatzënë, mbetën të vdekur dhe disa të tjerë u plagosën.
Ministria e Brendshme e administruar nga Hamasi konfirmoi se ndër të vrarët ishte Mohammad Marwan Salem, shefi i policisë për Jabalian, bashkë me disa efektivë të tjerë.
Burime nga policia pohojnë se Izraeli ka shtuar goditjet ndaj aparatit të sigurisë dhe komisariateve të Hamasit, duke lënë dhjetëra të vdekur që nga muaji tetor.
Izraeli insiston në dorëheqjen e Hamasit nga pushteti në Gaza dhe çarmatimin e tij. Grupi ka shprehur gatishmëri për të transferuar qeverisjen, por vijon të kundërshtojë dorëzimin e armatimit.
Një tjetër sulm ajror u regjistrua në Khan Yunis, ku mjekët njoftuan vrasjen e një burri 36-vjeçar dhe plagosjen e tre personave të tjerë.
Deri tani, forcat e armatosura izraelite nuk kanë lëshuar asnjë deklaratë lidhur me ngjarjet në Rafah dhe Jabalia.
Kjo përshkallëzim i ri përkon me praninë e një delegacioni të Hamasit në Kajro, ku po zhvillohen bisedime për ecjen përpara me fazën e dytë të planit të paqes të paraqitur nga presidenti amerikan Donald Trump për Gazën.
Burime të afërta me negociatat tregojnë se në tryezë janë çështjet e çarmatimit të Hamasit dhe tërheqjes së trupave izraelite, por deri më tani ka pasur përparim të kufizuar drejt një marrëveshjeje finale që do t’i jepte fund luftës.
Hamasi e konsideron shkeljen e armëpushimit nga ana e Izraelit si pengesë kryesore për kalimin në fazën e dytë të marrëveshjes.
Sipas përllogaritjeve, pothuajse i gjithë popullsia prej 2 milionë banorësh e Gazës, shumica e të cilëve janë shpërngulur disa herë gjatë konfliktit, jeton e ngjeshur në një brez të ngushtë bregdetar, kryesisht në tenda të improvizuara ose në gërmadhat e ndërtesave të shkatërruara.
Autoritetet izraelite pohojnë se gjatë sulmit të 7 tetorit 2023, militantët e udhëhequr nga Hamasi vranë rreth 1,200 vetë në Izrael. Në anën tjetër, Ministria e Shëndetësisë në Gaza raporton se numri i palestinezëve të vrarë në enklavë që nga nisja e ofensivës ka kaluar 73,000.
