Pas një vargu sulmesh dhe kundërsulmesh mes Iranit dhe Shteteve të Bashkuara, situata në Ngushticën e Hormuzit është tensionuar ndjeshëm, duke shtuar frikën për sigurinë e një prej arterieve detare më të rëndësishme për transportin botëror të energjisë.
Të lidhura
None found
Raportimet thonë se në fillim të javës Garda Revolucionare Islamike e Iranit (IRGC) goditi tre anije cisternë, ndërsa më pas SHBA-ja iu përgjigj me sulme kundër rreth 80 objektivave në bregdetin iranian.
Më tej, Irani ndërmori sulme me dronë dhe raketa ndaj bazave amerikane në Bahrein dhe Kuvajt. Këto shkëmbime zjarri vijuan edhe në vijim, teksa të dyja palët kanë mbajtur të njëjtën retorikë kërcënuese.
Sipas analistëve, bëhet fjalë për një situatë ku secila nga palët pret që kundërshtari të tërhiqet i pari. Pas një periudhe të gjatë përballjesh ushtarake, IRGC pretendon se ka fituar kapacitete të reja dhe synon të ndryshojë mënyrën e kontrollit të trafikut detar në Ngushticën e Hormuzit.
Teherani ka kërkuar që të gjitha anijet që kalojnë në këtë zonë të inspektohen nga oficerë iranianë, me arsyetimin se pas konfliktit nuk mund të rikthehen rregullat e mëparshme.
Këtij qëndrimi i janë kundërvënë SHBA-ja, vendet arabe të Gjirit dhe Organizata Ndërkombëtare Detare, të cilat e shohin si të papranueshëm kontrollin iranian mbi një nga korridoret tregtare më të rëndësishme në botë.
Edhe pse më herët ishte arritur një memorandum mirëkuptimi dhe janë bërë përpjekje diplomatike, përshkallëzimi i fundit ushtarak e ka vështirësuar më shumë arritjen e një marrëveshjeje afatgjatë për sigurinë dhe lirinë e lundrimit në rajon.
