Tërmetet e dyfishta që goditën Venezuelën më 24 qershor kanë lënë pas 3,811 viktima, ndërsa humbjet ekonomike nga kjo fatkeqësi natyrore llogariten në 6.7 miliardë dollarë.
Të lidhura
None found
Sipas autoriteteve venezueliane, vendi po përpiqet të sigurojë lirimin e rezervave të arit që ndodhen në Britani, me synimin që këto fonde të përdoren për rindërtimin.
Lëkundjet sizmike me magnitudë 7.2 dhe 7.5 ballë goditën vendin me një interval prej vetëm 39 sekondash, duke sjellë dëme të rënda sidomos në pjesën veriore të Venezuelës dhe në shtetin La Huira.
Të dhënat më të fundit tregojnë se, përveç të vdekurve, janë regjistruar 16,740 të plagosur dhe 17,907 persona kanë mbetur të pastrehë. Po ashtu, janë shpëtuar rreth 6,462 njerëz, ndërsa ndihmë është dhënë për më shumë se 86 mijë familje të prekura.
Përditësimi i bilancit u njoftua nga kryetari i parlamentit të Venezuelës, Jorge Rodriguez, i cili bëri të ditur se numri i viktimave është korrigjuar nga 3,685 në 3,811 persona.
Për të siguruar burime financiare për fazën e rindërtimit, presidentja në detyrë e Venezuelës, Delcy Rodriguez, i ka drejtuar një kërkesë Mbretit Charles III për lirimin e rreth 30 tonëve ar të depozituara në Bankën e Anglisë.
Ajo deklaroi se ky ar është pronë e popullit venezuelian dhe se duhet të shërbejë për përballimin e pasojave të tërmeteve. Kjo kërkesë pason përpjekjet e mëhershme të Karakasit për të marrë kontrollin mbi rezervat financiare jashtë vendit, të cilat vijojnë të mbeten të bllokuara për shkak të mosmarrëveshjeve politike dhe sanksioneve ndërkombëtare.
Organizata e Kombeve të Bashkuara ka vlerësuar se dëmet e shkaktuara nga tërmetet shkojnë në 6.7 miliardë dollarë, ose afërsisht 6% e Prodhimit të Brendshëm Bruto të Venezuelës.
Vështirësitë ekonomike që kanë goditur vendin gjatë viteve të fundit pritet ta komplikojnë edhe më tej rindërtimin, ndërsa autoritetet kanë bërë thirrje për ndihmë ndërkombëtare dhe për zhbllokimin e fondeve të ngrira për të menaxhuar pasojat e katastrofës.
