Ervin Karamuço, ekspert i kriminalistikës, ka zbuluar detaje lidhur me ndalimin e deputetëve nga Maqedonia e Veriut në pikën kufitare të Qafë Thanës, duke sqaruar se kjo masë nuk ka lidhje të drejtpërdrejtë me protestat në Shqipëri, por me dyshime që institucionet shqiptare kanë ngritur prej kohësh për veprimtari ekstremiste.
Të lidhura
None found
Ai tha se këta individë kanë qenë prej kohësh nën vëzhgimin e autoriteteve shqiptare, ndërsa për njërin prej tyre ka dyshime se financohet nga vende që, sipas tij, nuk janë mike me Shqipërinë.
“Ky nuk është rasti i parë. Këta persona janë paralajmëruar herë pas here nga institucionet tona për veprimtarinë e tyre. Për një prej tyre dyshohet se merr financime nga disa vende jo mike me Shqipërinë për të aktivizuar elementë ekstremistë në Maqedoninë e Veriut. Janë elementë që kanë ardhur dhe kanë qenë pjesë e protestave në Shqipëri. Dy herët e fundit disa prej tyre janë shpallur edhe ‘non grata’, madje njëri prej tyre kishte edhe pasaportë amerikane”, u shpreh Karamuço në emisionin “Real Story”.
Më tej, ai nënvizoi se nga informacionet që disponohen prej institucioneve, aktiviteti i këtyre personave lidhet me rrjete që financohen nga Lindja e Mesme.
“Nuk ka të bëjë drejtpërdrejt me protestën, por me aktivitetin e vazhdueshëm të disa elementëve ekstremistë fetarë në Maqedoninë e Veriut, të financuar me para të dyshimta nga Lindja e Mesme, të cilat depozitohen në disa shoqata atje. Bëhet fjalë për persona që konsiderohen rrezik real dhe që prej kohësh monitorohen nga institucionet shqiptare”, deklaroi ai.
Karamuço shprehu shqetësim edhe për klimën ndaj shqiptarëve në Maqedoninë e Veriut, duke sjellë në vëmendje sulme ndaj përfaqësuesve diplomatikë të Shqipërisë.
“Ndërkohë që këta vijnë dhe angazhohen në Shqipëri, duhet të shohin se gjuha shqipe në Maqedoninë e Veriut po nëpërkëmbet prej kohësh dhe nuk pashë askënd të protestonte për këtë. Po ashtu ekziston një frymë urrejtjeje ndaj përfaqësuesve diplomatikë shqiptarë. Këto janë çështjet që duhet të na shqetësojnë të gjithëve”, tha ai.
Si shembull, eksperti përmendi një ngjarje të ndodhur pak javë më parë në Shkup.
“Para disa javësh tentuan të hynin në banesën e ambasadorit tonë në Shkup, i helmuan qenin dhe më pas shkatërruan makinën e Ambasadës shqiptare në mes të Shkupit, gjatë një takimi zyrtar. Edhe pse automjeti mbante flamurin shqiptar, ai u sulmua nga persona të maskuar. Këto janë zhvillime serioze dhe nuk mund të injorohen”, theksoi Karamuço.
