Në kuadër të hetimeve për skandalin e korrupsionit të njohur si “Qatargate”, që ka tronditur institucionet e Bashkimit Europian, autoritetet belge kanë lëshuar një urdhër arresti për ish-Komisionerin Europian Dimitris Avramopoulos.
Ky zhvillim është konfirmuar nga një zyrtar i qeverisë greke, ndërsa është pasqyruar edhe nga mediat belge si dhe nga media të tjera në Greqi. Hetimi, që ka nisur në vitin 2022, fokusohet te dyshimet se disa zyrtarë të BE-së kanë përfituar ryshfete nga Katari për të ndikuar në politikat dhe vendimmarrjen e bllokut. “Qatargate” cilësohet si një prej aferave më të mëdha korruptive që kanë prekur institucionet europiane në dekadat e fundit.
Të lidhura
None found
Gjatë procedurave hetimore, autoritetet në Belgjikë kanë zhvilluar kontrolle dhe kanë sekuestruar afro 1.5 milion euro para kesh, mes tyre edhe një shumë e gjetur në një valixhe në një hotel në Bruksel. Avramopoulos, shtetas grek që ka mbajtur postin e Komisionerit Europian për Emigracionin deri në vitin 2019, është aktualisht deputet i partisë Nea Democracia në parlamentin grek.
Hetuesit janë përqendruar te lidhjet e tij me një organizatë joqeveritare të krijuar nga Antonio Panzeri, ish-deputet i Parlamentit Europian dhe figurë qendrore e skandalit “Qatargate”. Përmes kësaj organizate, ish-komisioneri dyshohet se ka marrë pagesa mujore në vlerën 5,000 euro.
Sipas autoriteteve belge, ai akuzohet për pjesëmarrje në një organizatë kriminale, ndërsa përfitimi financiar i pretenduar llogaritet në rreth 73,000 euro. Avramopoulos i ka kundërshtuar me forcë akuzat, duke i quajtur “plotësisht të pabazuara”. Ai ka deklaruar gjithashtu se do të kërkojë heqjen e imunitetit parlamentar dhe se i ka kërkuar Ministrisë së Drejtësisë së Greqisë që çështja të hetohet plotësisht dhe të merret një vendim i drejtë.
