Në kampin stërvitor të Spanjës në Tennessee është regjistruar një nga episodet më të pazakonta dhe argëtuese të Kupës së Botës 2026, teksa sulmuesi i kombëtares Borja Iglesias u gjend përballë një situate të papritur para se t’u bashkohej shokëve të skuadrës.
Pamjet e publikuara nga El Chiringuito tregojnë se futbollisti 33-vjeçar u ndalua pranë hyrjes së kompleksit stërvitor nga stafi i sigurisë, i cili në fillim nuk i lejoi hyrjen në ambientet e ekipit.
Të lidhura
None found
Shkaku i këtij momenti ishte i thjeshtë, por njëkohësisht i pabesueshëm: punonjësit e sigurisë nuk e njohën lojtarin spanjoll dhe vunë në dyshim identitetin e tij.
Iglesias u mundua t’u sqaronte rojeve se ishte pjesë e përfaqësueses së Spanjës dhe se duhej të hynte në kamp, por kjo nuk rezultoi e mjaftueshme për t’i bindur ata.
“Jam sulmues i ekipit kombëtar, duhet të hyj brenda”, raportohet se u tha ai punonjësve të sigurisë.
Pavarësisht kësaj, procedurat e sigurisë vijuan dhe lojtari u detyrua të priste deri në përfundimin e verifikimeve shtesë.
Vetëm pasi u kryen disa telefonata dhe u morën konfirmimet nga personat përgjegjës, Iglesias u lejua të hynte dhe të bashkohej me pjesën tjetër të skuadrës.
Ngjarja më pas u përhap me shpejtësi në rrjetet sociale, ku videoja u bë virale dhe solli reagime të shumta nga tifozët.
